اسقار مامين شىعىس قازاقستاندى گازداندىرۋ تۇجىرىمداماسىن ازىرلەۋدى تاپسىردى

بۇل تۋرالى ۇكىمەت وتىرىسىندا ق ر پرەمەر-ءمينيسترى اسقار مامين ايتتى، دەپ حابارلايدى قازاقپارات ءتىلشىسى.

«گازدى تۇتىنۋدىڭ بولجامدانىپ وتىرعان جىل سايىنعى ءوسۋىن ەسكەرە وتىرىپ، گازداندىرۋدىڭ باس سحەماسىن جاڭارتۋ قاجەت. بۇل ورايدا دەموگرافيالىق فاكتوردى، ونەركاسىپتىڭ ءوسىپ كەلە جاتقان قاجەتتىلىكتەرىن، ەكسپورتتىق پەرسپەكتيۆالاردى جانە قولدانىستاعى مىندەتتەمەلەردى ەسكەرۋ كەرەك. سونداي-اق بۇل ينۆەستورلار ءۇشىن دە ماڭىزدى. سەبەبى ولار ءۇشىن شيكىزات بازاسىنىڭ، اسىرەسە گازدىڭ جەتكىلىكتى بولۋى - نارىققا كىرۋدىڭ نەگىزگى شارتتارىنىڭ ءبىرى»، - دەدى اسقار مامين.

وسىعان وراي پرەمەر-مينيستر ەلىمىزدىڭ ەنەرگەتيكا مينيسترلىگىنە مۇددەلى مەملەكەتتىك ورگاندارمەن جانە ۇيىمدارمەن بىرلەسىپ، 2021-جىلعى 1- ساۋىرگە دەيىنگى مەرزىمدە گازداندىرۋدىڭ باس سىزباسىنىڭ وزەكتەندىرىلگەن جوباسىن ازىرلەۋدى تاپسىردى.

«سولتۇستىك وڭىرلەردى گازداندىرۋ ماقساتىندا 2021-جىلدىڭ 1- ناۋرىزىنا دەيىن «سارىارقا» گاز قۇبىرى جوباسىنىڭ 2 جانە 3 كەزەڭدەرىن ىسكە اسىرۋ بويىنشا تەحنيكالىق-ەكونوميكالىق نەگىزدەمەلەردى جاڭارتىپ، بارلىق ساراپتامانى الۋدى تاپسىرامىن. 2021-جىلدىڭ 1- ساۋىرىنە دەيىن ەنەرگەتيكا مينيسترلىگى شىعىس قازاقستان وبلىسىن گازداندىرۋ تۇجىرىمداماسىن دايىنداپ، قاجەتتى ەسەپ مەن كۇتىلەتىن اسەردى قاراستىرسىن»، - دەدى ۇكىمەت باسشىسى.

سونىمەن قاتار پرەمەر-مينيستر بۇگىنگى كۇنى وڭىرلەردەگى گازبەن جابدىقتاۋ نىساندارىنىڭ سانى مىڭنان اساتىندىعىنا نازار اۋدارتتى.

«ولار قايتا جاڭعىرتۋدى قاجەت ەتەدى. بۇل رەتتە، قازىرگى ۋاقىتتا، وسى نىسانداردى اكىمدىكتەردەن پايدالانۋشى ۇيىمداردىڭ بالانسىنا بەرۋ جۇمىستارى جۇرگىزىلىپ جاتىر. سونىمەن بىرگە بۇل ورىن الىپ وتىرعان دەفەكتىلەردى، جوندەۋدى جانە قاجەتتى قۇجاتتاردى قالپىنا كەلتىرۋگە بايلانىستى قوسىمشا شىعىنعا اكەلىپ وتىر. وسىعان وراي تۇركىستان، اقتوبە، جامبىل، ماڭعىستاۋ، باتىس قازاقستان، الماتى وبلىستارىنىڭ جانە الماتى قالاسىنىڭ اكىمدىكتەرى جەرگىلىكتى بيۋجەتتەن قاجەتتى قاراجاتتى قاراستىرسىن»، - دەدى اسقار مامين.