ەلدى مەكەندەردى گازداندىرۋدى بەلسەندى جالعاستىرۋ كەرەك - اسقار مامين

بۇل تۋرالى ۇكىمەت وتىرىسىندا ق ر پرەمەر-ءمينيسترى اسقار مامين ايتتى، دەپ حابارلايدى قازاقپارات ءتىلشىسى.

«الەمدىك ەنەرگەتيكا نارىعىن تالداۋ گاز ونەركاسىبى ەنەرگيا تاسىمالداۋشىلاردىڭ وزگە ءتۇرىن ءوندىرۋ مەن تۇتىنۋعا قاراعاندا قارقىندى دامىپ كەلە جاتقانىن كورسەتىپ وتىر. قازاقستاندا دا وسىنداي جاعداي بايقالادى. بيىل تۇتىنۋ 16,5 ميلليارد تەكشە مەترگە دەيىن وسەدى دەپ كۇتىلۋدە. ەڭ الدىمەن بۇل تۇتىنۋشىلار سانىنىڭ وسۋىمەن بايلانىستى. وسى ورايدا ەلەكتر ەنەرگياسىن ءوندىرۋ ءۇشىن گاز - 50 پايىز، كوممۋنالدىق-تۇرمىستىق سەكتور - 36، ونەركاسىپ 14 پايىز پايدالاناتىن بولادى. بيىلعى جىلدىڭ قورىتىندىسى بويىنشا ەل تۇرعىندارىن گازداندىرۋ كورسەتكىشى 53 پايىز دەڭگەيىندە جوسپارلانعان، 9,8 ميلليون ادام تابيعي گازعا قولجەتىمدىلىككە يە بولادى»، - دەدى ۇكىمەت باسشىسى.

ونىڭ ايتۋىنشا، 2025-جىلى گازداندىرۋ دەڭگەيى 60 پايىزعا جەتىپ، 2120 ەلدى مەكەن نەمەسە 11,7 ميلليون تۇرعىن قوسىلادى.

بۇعان «سارىارقا» جوباسىنىڭ 2 جانە 3 كەزەڭدەرىنىڭ ىسكە اسىرىلۋى، شىعىس قازاقستاندى گازداندىرۋ جانە دە وڭىرلىك جەلىلەردى كەڭەيتۋ مەن رەكونسترۋكتسيالاۋ ىقپالىن تيگىزەدى.

«سوندىقتان نۇرلان اسقار ۇلى، ەلدى مەكەندەردى گازداندىرۋدى بەلسەندى تۇردە جالعاستىرۋ كەرەك. بۇل - ۇكىمەتتىڭ باسىم مىندەتتەرىنىڭ ءبىرى»، - دەدى اسقار مامين ەنەرگەتيكا ءمينيسترى نوعايەۆقا قاراتا.