الەم ەلدەرىندە مەكتەپتەر قايتا اشىلا باستادى

None
None
نۇر - سۇلتان. قازاقپارات - الەم ەلدەرى شەكتەۋ شارالارىن جەڭىلدەتىپ، مەكتەپتەر قايتا اشىلا باستادى، دەپ حابارلايدى «حابار 24».

ولاردىڭ قاتارىندا، گەرمانيا، اۆستراليا مەن شوتلانديا بار. ال انگليا مەكتەپتەرى كەلەر ايدىڭ باسىندا اشىلادى. ءبىر ايتا كەتەرلىگى، ءبىلىم بەرۋ مەكەمەلەرى بارلىق ەلدە بىردەي اشىلىپ جاتقان جوق. ءداستۇرلى وقۋ فورماتىنا جەتە الماي جاتقاندار دا بار.

گەرمانيادا 16 ءوڭىردىڭ 10-نىندا مەكتەپتەر مەن بالاباقشالار قايتا اشىلدى. ءبىراق ءبىلىم بەرۋ مەكەمەلەرى ساقتىق تالاپتارىن قاتاڭ ساقتاۋى ءتيىس. ۇنەمى ماسكا تاعىپ، سانيتايزەرلەردى قولدانۋ مىندەتتى. سىنىپتاعى پارتالار اراسى كەمىندە 1,5 مەتر بولادى. دالىزدەردە تەك ءبىرجاقتى قوزعالىس قاراستىرىلعان. وسىنداي تالاپتارعا قاراماستان، مەكتەپتىڭ قايتا اشىلعانىنا اتا- انالار مەن مۇعالىمدەر قۋانىپ جاتىر.

انيا نەسسلينگ، باستاۋىش مەكتەپ مۇعالىمى:

- وقۋشىلارمەن قايتا قاۋىشقانىما قۋانىشتىمىن. بالالار ۇزاق ۋاقىت ۇيدە وتىردى. بۇل ءبىر جاعىنان اتا- انالار ءۇشىن قيىنعا سوقتى. وقۋشىلارمەن مەكتەپ قابىرعاسىندا قايتا كەزدەسكەنىمىزگە ريزامىز. بۇگىندە گەرمانيانىڭ ءبىلىم بەرۋ سالاسىندا 1 ميلليوننان استام ادام قىزمەت ەتەدى. ولار ۆاكسينالاۋ بويىنشا باسىمدىق بەرىلەتىن توپقا جاتادى. سوندىقتان ءار مۇعالىم ءوز قالاۋىنشا كوروناۆيرۋسقا قارسى ەكپە سالدىرا الادى. پەداگوگتارعا اپتاسىنا ەكى رەت كوۆيدكە قارسى تەستىلەۋدەن ءوتۋ مۇمكىندىگى بەرىلگەن.

جۋىردا شوتلانديالىق وقۋشىلار دا قايتادان پارتاعا وتىردى. ءبىراق ءبارى ەمەس. مەكتەپ قابىرعاسىنا الدىمەن باستاۋىش سىنىپ بالالارى ورالادى. ءبىر ايدان سوڭ جوعارعى سىنىپ وقۋشىلارى دا ءداستۇرلى وقۋ فورماتىندا ءبىلىم الا باستايدى. ال انگليادا تۇراتىن بالالار وفلاين رەجيمگە تەك كەلەسى ايدىڭ 8-ىندە كوشەدى.

بوريس دجونسون، ۇلى بريتانيا پرەمەر- ءمينيسترى:

- ەكى اپتادان كەيىن مەكتەپ، كوللەدج جانە ۋنيۆەرسيتەتتە ءبىلىم الاتىن ازاماتتاردىڭ ءبارى ءداستۇرلى وقۋ فورماتىنا كوشەدى. ءبىراق ساقتىق ماقساتىندا ولار اپتاسىنا ەكى مارتە كوۆيدكە قارسى تەستىلەۋدەن وتۋگە مىندەتتەلەدى.

اۆستراليانىڭ كۆينسلەند شتاتىنداعى ۋنيۆەرسيتەتتەر دە وفلاين وقۋعا كوشتى. ءبىراق دارىستەر سانيتارلىق تالاپتارعا ساي ءوتۋى كەرەك. ياعني اۋديتورياداعى ستۋدەنتتەر سانى شەكتەۋلى بولادى. وعان قوسا، ءبىلىم الۋشىلار ماسكا تاعىپ وتىرۋعا مىندەتتى.

بليتس:

- ۋنيۆەرسيتەتكە ورالعانىما وتە قۋانىشتىمىن. ويتكەنى حيميانى ونلاين وقۋ وتە قيىن. اسىرەسە سوڭعى كۋرستا. ال اۋديتوريادا وتىرعاننىڭ ءبىر ارتىقشىلىعى، تۇسىنبەگەنىڭدى بىردەن مۇعالىمنەن نە بولماسا جانىڭداعى ستۋدەنتتەن سۇراۋعا بولادى.

ال لوس- اندجەلەس قالاسىندا اتا- انالار ەرەۋىل وتكىزدى. شاراعا ءتىپتى وقۋشىلار دا قاتىسقان. ءبارىنىڭ ايتارى ءبىر. ولار مەكتەپتەردىڭ قايتا اشىلۋىن تالاپ ەتىپ وتىر. جينالعان جۇرت ونلاين ساباقتان شارشاعانىن ايتادى. جۋىردا جەرگىلىكتى دەنساۋلىق ساقتاۋ دەپارتامەنتى وڭىردە ەپيدەميولوگيالىق احۋالدىڭ جاقسارعانىن جاريا ەتكەن. قازىر 100 مىڭ تۇرعىنعا شاققانداعى دەرەكتەر سانى 25-كە دەيىن تومەندەگەن. بۇل كورسەتكىش مەكتەپتەردىڭ قايتا اشىلۋىنا جەتكىلىكتى. الايدا بيلىك بالالاردىڭ پارتاعا قايتا وتىرۋى ءۇشىن مۇعالىمدەردىڭ بارلىعى ۆاكسينا سالدىرۋ كەرەك دەيدى. ءبىراق ءبىلىم بەرۋ سالاسىنىڭ قىزمەتكەرلەرى قاشان ەكپە الاتىنى بەلگىسىز.

بليتس:

- ءبىز مەكتەپكە ورالعىمىز كەلەدى. قازىر ەپيدەميولوگيالىق احۋال جاقساردى. ءبىراق بيلىكتىڭ مەكتەپتەردى نەگە اشپاي وتىرعانى تۇسىنىكسىز. مۇعالىمدەردىڭ كىناسى قانشا؟ ولار ساباقتى تۇسىندىرۋگە بارىن سالادى. الايدا ولار ەكراننىڭ ار جاعىندا، ءبىز مىنا جاعىندا وتىرامىز. قانشا دەگەنمەن جاڭا ماتەريالدى ءتۇسىنۋ قيىن.

- بالالار ۇيدە وتىرىپ، مەزى بولدى. كۇيزەلىسكە ۇشىراپ جاتىر. ءبىلىم بەرۋ ساپاسى تومەندەپ، وقۋشىلاردىڭ ۇلگەرىمى ناشارلاپ بارادى. سول ءۇشىن مەكتەپتەردى قايتا اشۋدى تالاپ ەتەمىز.

نەگىزى اتا- انالاردىڭ رەنجيتىنى دە بار. ويتكەنى ا ق ش- تىڭ وزگە وڭىرلەرىندە مەكتەپتەر اشىلىپ قويعان.

www.24.kz

سوڭعى جاڭالىقتار