پرەزيدەنت اۋىل اكىمدەرىن سايلاۋعا قاتىستى پىكىر ءبىلدىردى
بۇل تۋرالى ۇلتتىق قوعامدىق سەنىم كەڭەسىنىڭ بەسىنشى وتىرىسىندا ق ر پرەزيدەنتى قاسىم-جومارت توقايەۆ ءمالىم ەتتى، دەپ حابارلايدى قازاقپارات ءتىلشىسى.
«تاعى ءبىر ماڭىزدى ماسەلە - ءوزىن-ءوزى باسقارۋ تاجىريبەسىن دامىتۋ جانە جەرگىلىكتى دەڭگەيدەگى سايلاۋ ينستيتۋتىن نىعايتۋ. اۋىلدا، اۋداندا تۇراتىن ءاربىر جان ءوزىنىڭ جانە وتباسىنىڭ بولاشاعىنا ءوزى جاۋاپتى ەكەنىن سەزىنۋگە ءتيىس. ولاردىڭ پىكىرى بارىنشا ەسكەرىلۋى كەرەك. مەن بىلتىرعى جولداۋىمدا ۇكىمەتكە جەرگىلىكتى ءوزىن- ءوزى باسقارۋدى دامىتۋدىڭ جاڭا تۇجىرىمداماسىن ازىرلەۋدى تاپسىردىم. ءتيىستى جۇمىستار اتقارىلۋدا. بۇل قۇجاتتىڭ جوباسىن رەفورمالار جونىندەگى جوعارى كەڭەس الداعى ۋاقىتتا قارايتىن بولادى. ال، ەكىنشى جارتىجىلدىقتا ماسەلەنى كەيىنگە ىسىرماي، ءتيىستى زاڭ جوباسىن دايىنداۋعا كىرىسۋ كەرەك»، - دەدى مەملەكەت باسشىسى.
پرەزيدەنتتىڭ ايتۋىنشا، ستراتەگيالىق ماڭىزى بار وسى قۇجاتتاردا بۇگىنگى احۋالدىڭ ەرەكشەلىكتەرى ەسكەرىلۋى ءتيىس.
«قازىر ءبىز كەنتتەردىڭ، اۋىلدار مەن اۋىلدىق وكرۋگتەردىڭ اكىمدەرىن تىكەلەي سايلاۋعا دايىندالىپ جاتىرمىز. سايلاۋ بيىل شامامەن تامىز- جەلتوقسان ايلارى اراسىندا وتەدى. وسى جىلى 786 اۋىل اكىمىنىڭ وكىلەتتىگى اياقتالادى. ياعني، 800 جۋىق ەلدى مەكەندى قامتيتىن جەرگىلىكتى سايلاۋ ناۋقانى وتەدى. بۇل ەلىمىزدىڭ قوعامدىق- ساياسي ومىرىندەگى ەلەۋلى وقيعا بولماق»، - دەدى ق. توقايەۆ.
بۇدان بۇرىن حابارلانعانداي، پرەزيدەنت اۋدان اكىمدەرىنىڭ تىكەلەي سايلاۋ 2024 -جىلى وتكىزۋ كەرەك دەپ سانايتىنىن ايتتى.
«كەلەسى ماڭىزدى قادام - اۋدان اكىمدەرىنىڭ تىكەلەي سايلاۋى. مەن بۇل سايلاۋدى 2024 -جىلى وتكىزۋ كەرەك دەپ سانايمىن. وسى باستاما ەلىمىزدى دەموكراتيالاندىرۋعا جانە جەرگىلىكتى باسقارۋ ينستيتۋتىن نىعايتۋعا ەلەۋلى ۇلەس قوسادى دەپ سەنەمىن»، - دەدى مەملەكەت باسشىسى.
ەسكە سالساق، ۇلتتىق كەڭەستىڭ بەسىنشى وتىرىسى ءوتىپ جاتىر. ۇلتتىق قوعامدىق سەنىم كەڭەسى قۇرامىندا روتاتسيا جاسالدى. جاڭارتىلعان ءماجىلىس قۇرامىندا ۇلتتىق كەڭەستىڭ 9 مۇشەسى بار. وتكەن جىلى 22-قازاندا ق ر پرەزيدەنتى قاسىم-جومارت توقايەۆتىڭ قاتىسۋىمەن ۇلتتىق قوعامدىق سەنىم كەڭەسىنىڭ ءتورتىنشى وتىرىسى، ال 2019 -جىلى 6-قىركۇيەكتە العاشقى وتىرىسى بولدى.
اۆتور: رۋسلان عابباسوۆ