15:45, 25 - اقپان 2021 | GMT +6
پرەزيدەنت ءبىلىم مينيسترلىگىنە ەرەكشە قاجەتتىلىگى بار بالالارعا قاتىستى تاپسىرما بەردى
نۇر-سۇلتان. قازاقپارات - ق ر پرەزيدەنتى قاسىم-جومارت توقايەۆ ەرەكشە قاجەتتىلىگى بار بالالاردى قولداۋعا قاتىستى ەلىمىزدىڭ ءبىلىم جانە عىلىم مينيسترلىگىنە تاپسىرما بەردى، دەپ حابارلايدى قازاقپارات ءتىلشىسى.
«وكىلەتتى ورگانعا ەرەكشە قاجەتتىلىگى بار بالا مەن ونىڭ وتباسى ءۇشىن ءبىرىڭعاي باعدار تۇرىندەگى ءىس- قيمىلدىڭ تۇسىنىكتى الگوريتمىن قۇرۋ قاجەت. وڭىرلەردە بار ارناۋلى مەكەمەلەردى ەسكەرە وتىرىپ، ولاردا بالا تۋعان ساتتەن باستاپ كورسەتىلەتىن بارلىق مەملەكەتتىك قىزمەتتەر قاراستىرىلۋى كەرەك»، - دەدى مەملەكەت باسشىسى ۇلتتىق قوعامدىق سەنىم كەڭەسىنىڭ 5-وتىرىسىندا.
ق ر پرەزيدەنتىنىڭ اتاپ وتۋىنشە، ءبىلىم جانە عىلىم مينيسترلىگى ەرەكشە بالالاردىڭ ءبىلىم الۋ قۇقىعىن جۇزەگە اسىرۋ بولىگىندە ناقتى جۇمىستار جۇرگىزۋى قاجەت.
«بۇل ءىس-شارالاردىڭ بارلىعى ەرەكشە قاجەتتىلىگى بار بالالاردىڭ الەۋەتىن تولىققاندى جۇزەگە اسىرۋعا سەپتىگىن تيگىزەتىندىگىنە سەنىمدىمىن»، - قاسىم-جومارت توقايەۆ.
اۆتور: مارلان جيەمباي