قازاقستاندىق قۇرىلىس ماتەريالدارىن ءتيىمدى باعادا الۋ ءۇشىن ونلاين پلاتفورما قۇرىلدى

«قازىرگى ۋاقىتتا قازاقستان تۇرعىن ءۇي كومپانياسى «نۇرلى جەر» باعدارلاماسىنا سايكەس تۇرعىن ءۇي قۇرىلىسىنداعى قازاقستاندىق قۇرىلىس ماتەريالدارىنىڭ ۇلەسىن ۇلعايتۋ ءۇشىن ونلاين- پلاتفورمانى (قۇرىلىس ماتەريالدارى ماركەتپلەيسى) دامىتىپ جاتىر. ونلاين الاڭدا ەلدەگى بارلىق قازاقستاندىق قۇرىلىس ماتەريالدارىن وندىرۋشىلەر ءوز ونىمدەرى تۋرالى اقپاراتتى ورنالاستىرا الادى، ال قۇرىلىس كومپانيالارى قاجەتتى قازاقستاندىق ماتەريالداردى دەلدالسىز ەڭ ءتيىمدى باعامەن ساتىپ الا الادى»، - دەدى «قازاقستان تۇرعىن ءۇي كومپانياسى» ا ق باسقارما ءتوراعاسىنىڭ ورىنباسارى التاي كۇزدىبايەۆ ورتالىق كوممۋنيكاتسيالار قىزمەتىندە وتكەن ونلاين باسپا ءسوز ءماسليحاتىندا.

سپيكەردىڭ ايتۋىنشا، 2020 -جىلدىڭ ءبىرىنشى كەزەڭىندە «نۇرلى جەر» باعدارلاماسى بويىنشا سالىنىپ جاتقان 106 -جىلجىمايتىن مۇلىك نىسانىنىڭ ەلەكتروندى سمەتالارىنا تالداۋ جاسالعان. ەلەكتروندى سمەتالاردىڭ پارسينگ الگوريتمى جاسالعان جانە «نۇرلى جەر» احۋالدىق ورتالىعىندا قۇرىلىس ماتەريالدارىنىڭ بارلىق قاجەتتىلىگى ەسەپتەلگەن. قازىرگى ۋاقىتتا 106 نىساننىڭ قۇرىلىس ماتەريالدارىنا سۇرانىسى 51,4 ميلليارد تەڭگەنى قۇرايدى.

«سونداي- اق، ءبىز «نۇرلى جەر» باعدارلاماسى بويىنشا قۇرىلىس كومپانيالارىنىڭ قۇرىلىس ماتەريالدارىنا قاجەتتىلىكتەرى بويىنشا ونلاين ۆيترينا جاسادىق. وندا قازاقستاندىق قۇرىلىس ماتەريالدارىن وندىرۋشىلەر سۇرانىستى كورە الادى جانە قاجەت بولعان جاعدايدا تىركەۋدەن وتكەن قۇرىلىس كومپانيالارىنا كوممەرتسيالىق ۇسىنىستار جىبەرە الادى. قۇرىلىس كومپانيالارى جەكە كابينەتىنە قۇرىلىس ماتەريالدارىن وندىرۋشىلەردەن كوممەرتسيالىق ۇسىنىستار تۇسكەنى تۋرالى حابارلاما الادى جانە سول جەردە كوممەرتسيالىق ۇسىنىستار قاراستىرۋعا، تاڭداۋعا مۇمكىندىك الادى»، - دەيدى ا. كۇزدىبايەۆ.

قازىرگى ۋاقىتتا ونلاين- ۆيترينا www.stroimaterial.kz ادرەسى بويىنشا تەستىلەۋ رەجيمىندە ىسكە قوسىلعان.

ايتا كەتەيىك، 2020 -جىلدىڭ قورىتىندىسى بويىنشا ەلىمىزدە 15,3 ميلليون شارشى مەتر نەمەسە 140 مىڭ تۇرعىن ءۇي پايدالانۋعا بەرىلگەن. بۇل 2019 -جىلعى كەزەڭنەن % 17 جوعارى.

اۆتور: ايجان سەرىكجان قىزى