ۇزىنشۇلىق پيپپي تۇڭعىش رەت قازاق تىلىندە جارىق كوردى

شاراعا شۆەتسيا كورولدىگىنىڭ قازاقستانداعى توتەنشە جانە وكىلەتتى ەلشىسى ماتس فويەر، جازۋشىلار، جۋرناليستەر جانە قوعام بەلسەندىلەرى كەلدى.

«ق ر پرەزيدەنتى قاسىم- جومارت توقايەۆ «تاۋەلسىزدىك بارىنەن قىمبات» اتتى ماقالاسىندا بالالار ادەبيەتىنە ەرەكشە ءمان بەرىپ، «ءتىل يگەرۋ ءۇشىن بالالار ادەبيەتىنىڭ اتقاراتىن ءرولى زور. سوندىقتان قازاق قالامگەرلەرىنىڭ ۇزدىك شىعارمالارىنا قوسا، بالالارعا ارنالعان شەتەل جازۋشىلارىنىڭ دا تاڭداۋلى تۋىندىلارىن اۋدارىپ، كوپتەپ باسىپ شىعارۋدى جانە تاراتۋدى قولعا العان ءجون» دەگەن بولاتىن. 2021 -جىل - قازاقستانداعى بالالار مەن جاسوسپىرىمدەردىڭ كىتاپ وقۋىن قولداۋ جىلى بولىپ جاريالانعاندىعى دا بەلگىلى. وسى ماقساتتا «فوليانت» باسپاسى قازىرگى ۇرپاقتىڭ پسحولوگياسىنا ءتان، ءتالىم- تاربيەلىك ماڭىزى بار ساپالى تۋىندىلاردى باسىپ شىعارۋدى، الەمدىك ادەبيەتتە ورنى بار كەلەلى شىعارمالاردى اۋدارۋدى قولعا الىپ وتىر»، - دەپ حابارلادى باسپا ءۇيى.

كىتاپتى قازاق تىلىنە اۋدارعان ميرا سەمباي قىزى شىعارمانى تولىق اۋدارۋعا ءۇش ايداي ۋاقىت كەتكەنىن ايتتى.

«كوپ بالالالى انا بولعاندىقتان ءوزىم دە بالالارىما ارنالعان قازاقشا كىتاپتار ىزدەپ ينتەرنەت- دۇكەندەردى اقتارىپ وتىراتىنمىن. ايگىلى شۆەد جازۋشىسى استريد ليندگرەننىڭ «پيپپي ۇزىنش ۇلىق» شىعارماسىن اۋدارۋ مەن ءۇشىن ۇلكەن تاجىريبە، قىزىقتى جۇمىس بولدى. قازاق تىلىندەگى بالالار شىعارماسىنا تاعى ءبىر كىتاپتىڭ قوسىلاتىنى جانە وعان سەبەپكەر بولعانىم - ۇلكەن جەتىستىك. ءوزىم دە بالالارعا ارناپ شىعارمالار جازىپ جۇرگەندىكتەن، ءارى پيپپيدىڭ وقيعالارى جەڭىل، ويناقى بولعاندىقتان اۋدارمادا ايتارلىقتاي قيىندىق بولمادى. رەداكتورمەن « Pippi

ەسىمىن پەپپي، الدە پيپپي دەپ الامىز با؟» دەپ ءبىراز تالقىعا سالىپ، ءتۇپنۇسقاسىنا سۇيەنىپ، پيپپي نۇسقاسىن تاڭدادىق»، - دەدى ميرا سەمباي قىزى.

يۋنەسكو ۇيىمىنىڭ مالىمەتىنشا، استريد ليندگرەن الەمنىڭ ەڭ كوپ اۋدارىلاتىن 20 اۆتورى اراسىندا 18-ورىندا، بۇل تىزىمدە ا. ليندگرەن فەدور دوستويەۆسكي، ەرتەگى پاتشاسى گانس حريستيان اندەرسەندەرمەن قاتار تۇر. ا. ليندگرەن ادەبيەت الاڭىندا عانا ەمەس، شۆەتسيادا قوعامدىق پىكىر كوشباسشىسى، ەلىنىڭ بەلسەندى جۋرناليسى بولعان. 76 جىل بۇرىن جارىق كورگەن «ۇزىنش ۇلىق پيپپي» ەڭبەگى شۆەتسيادا «بالاقاي جانە شاتىردا تۇراتىن كارلسون» كىتابىنان الدەقايدا تانىمال ەكەنىن بىرەۋ بىلسە، بىرەۋ بىلە بەرمەس. 2005 -جىلى يۋنەسكو الەمدە ەڭ كوپ اۋدارىلاتىن كىتاپتار ءتىزىمىن جاريالادى. تىزىمگە سايكەس، ۇزىنش ۇلىق پيپپي 5-ورىندا.

«ۇزىنش ۇلىق پيپپي» سوعىستان كەيىنگى شۆەد بالالارى ءۇشىن بوستاندىق، ومىرگە دەگەن سۇيىسپەنشىلىك سيمۆولىنا اينالدى. ليندگرەن بالالارعا قارسى زورلىق- زومبىلىقتى توقتاتۋ مەن ولارعا دەگەن قۇرمەت سەزىمىن قالىپتاستىرۋ قاجەتتىگىن قوعامعا جەتكىزۋ ءۇشىن بارلىق مۇمكىندىكتى پايدالاندى. بارلىق كىتاپتارىنان «ەركىن تاربيەلەۋ شەكارانىڭ نەمەسە اتا- اناعا قۇرمەتتىڭ جوقتىعىن بىلدىرمەيدى، بۇل اتا- انانىڭ بالاعا قۇرمەتىن بىلدىرەدى»، «بالاڭىزعا شىڭ كوڭىلمەن ءمان بەرىڭىز»، «بالاڭىزدى قولداڭىز»، «بالاڭىزدى تىڭداۋدى ۇيرەنىڭىز»، «بالاڭىزبەن ويناڭىز»، «بالاڭىزبەن سويلەسىڭىز» جانە ەڭ باستىسى «بالاڭىزعا قول كوتەرمەڭىز» دەگەن يدەيا بايقالادى.

اۆتور: ايجان سەرىكجان قىزى