ەرلان قارين ۇلتتىق كەڭەس وتىرىسىندا كوتەرىلگەن ەڭ نەگىزگى باستامالاردى اتادى

ۇلتتىق قوعامدىق كەڭەسىنىڭ بەسىنشى وتىرىسى جونىندە پرەزيدەنتتىڭ كومەكشىسى ەرلان قارين وسىلاي دەدى، دەپ حابارلايدى قازاقپارات ءتىلشىسى.

«بۇگىن ۇلتتىق كەڭەستىڭ بەسىنشى وتىرىسى ءوتتى. كەزدەسۋدىڭ ءبىرىنشى بولىگىندە ۇلتتىق كەڭەستىڭ جۇمىس توبىنىڭ وكىلدەرى اتقارىلعان جۇمىستار تۋرالى قىسقاشا ەسەپ بەردى. مارات شيبۇتوۆ، قايىربەك ارىستانبەكوۆ، ەمين اسكەروۆ جانە ماكسيم روجين ءوز باياندامالارىندا ۇلتتىق كەڭەستىڭ باستامالارى قالاي جۇزەگە اسىرىلىپ جاتقانى تۋرالى ايتىپ، كەيبىر ۇسىنىستارىن ورتاعا سالدى»، - دەپ جازدى ەرلان قارين Facebook پاراقشاسىندا.

ونىڭ ايتۋىنشا، وتىرىستىڭ ەكىنشى بولىگىندە مەملەكەت باسشىسى بىرنەشە باعىت بويىنشا اۋقىمدى باستامالار پاكەتىن ۇسىنعان. ەرلان قارين بۇل رەتتە ەلباسىنىڭ اۋىل شارۋاشىلىعى جەرلەرىن شەتەلدىك ازاماتتار مەن كومپانيالارعا ساتۋعا جانە جالعا بەرۋگە تىيىم سالۋدى زاڭداستىرۋعا قاتىستى تاپسىرماسىن ەرەكشە اتاپ ءوتتى. سونىمەن قاتار قاسىم- جومارت توقايەۆ 2024 -جىلى اۋدان اكىمدەرىن تىكەلەي سايلاۋ ارقىلى انىقتاۋ تۋرالى دا ءسوز قوزعادى.

بۇل - ساياسي جاڭعىرۋ جولىنداعى ايتارلىقتاي سالماقتى قادام. سونىمەن بىرگە مەملەكەت باسشىسىنىڭ باسقا دا ماڭىزدى جانە وزەكتى باستامالارى نازار اۋدارۋعا تۇرارلىق. ول باستامالار شارتتى تۇردە بەس بلوكقا بولىنەدى: تۇرعىن ءۇي- ەكونوميكالىق ساياساتتى جەتىلدىرۋ، ءبىلىم بەرۋ ماسەلەلەرى، ينكليۋزيۆتى قوعامدىق ورتانى قۇرۋ، ادام قۇقىقتارىن قورعاۋ جانە ساياسي رەفورمالاردى دايەكتى تۇردە جۇزەگە اسىرۋ. ەرلان قارين كوتەرىلگەن باستامالاردى بىلايشا ەرەكشەلەپ اتاپ ءوتتى:

- «نۇرلى جەر» باعدارلاماسىنىڭ باعالارى بويىنشا تۇرعىن ءۇيدى كەيىننەن ساتىپ الۋ ءۇشىن قۇرىلىس سالۋشىلارمەن وففتەيك- كەلىسىمشارتتار جاساسۋ ارقىلى جاڭا بيۋدجەتتىك ساناتتاعى تۇرعىن اۋدانىن قۇرۋ؛

- جۇمىس بەرۋشىلەردىڭ ءوز جۇمىسكەرلەرىنە تۇرعىن ءۇي سالۋعا كەتكەن شىعىندارىنىڭ %50 - نا دەيىن مەملەكەت بيۋدجەتىنەن وتەۋ ارقىلى اۋىلدى جەرلەردە تۇرعىن ءۇي قۇرىلىسى ماسەلەسىن شەشۋ؛

- مەديتسينالىق ج و و- لارداعى ستيپەنديا مولشەرىن ۇلعايتۋ؛ - تەك مەديتسينالىق مەكەمەگە حابارلاسۋ ارقىلى مۇگەدەكتىكتى انىقتاۋ پروتسەدۋراسىن جەڭىلدەتۋ؛

- 2025 -جىلعا دەيىن قازاقستان رەسپۋبليكاسىندا ءقاۋىپسىز ەڭبەكتى قامتاماسىز ەتۋ جونىندەگى ءىس- شارالار جوسپارىن ازىرلەۋ؛

- 14 جاھاندىق ينديكاتورعا نەگىزدەلگەن ادام قۇقىقتارىنىڭ ساقتالۋىن باعالاۋدىڭ ۇلتتىق ينديكاتورلارىن ەنگىزۋ؛ - زاڭدى تۇلعالاردىڭ كامەلەتكە تولماعانداردىڭ قۇمار ويىندارعا قاتىسقانى نەمەسە ولاردى سوعان جىبەرگەنى ءۇشىن ويىن بيزنەستەرىنىڭ ليتسەنزياسىن توقتاتۋعا دەيىن اكىمشىلىك جاۋاپكەرشىلىكتى ەنگىزۋ؛

- ىشكى ىستەر مينيسترلىگى جانىنداعى ايەلدەردى زورلىق- زومبىلىقتان قورعاۋ بولىمشەلەرىنىڭ شتاتتارىن قالپىنا كەلتىرۋ؛

- بارلىق «كورىنبەيتىن» ايماقتاردى جانە باسقالارىن قامتۋدى كوزدەيتىن قىلمىستىق- اتقارۋ جۇيەسى مەكەمەلەرىندە جانە پوليتسيا بولىمشەلەرىندە بەينەباقىلاۋ جۇيەسىن ەنگىزۋ بويىنشا ناقتى ءىس- شارالار جوسپارىن ازىرلەۋ.

«ايتا كەتەرلىگى، بۇگىنگى باستامالاردىڭ كوبى ۇلتتىق كەڭەس مۇشەلەرىنىڭ ۇسىنىستارى نەگىزىندە تۇجىرىمدالدى. پرەزيدەنتتىڭ ءوز سوزىندە ءلاززات قوجاحمەتتى، ايمان وماروۆا، ارمان قاشقىنبەكوۆ، گۇلميرا يلەۋوۆا، ايگۇل ورىنبەك جانە راحيم وشاقبايەۆتى اتاپ ءوتۋى تەگىن ەمەس. قوعام قايراتكەرلەرى، ساراپشىلار مەن بيلىك ورگاندارىنىڭ ءوزارا ءىس- قيمىلىنىڭ بۇل فورماتى ءىس جۇزىندە «حالىق ۇنىنە قۇلاق اساتىن مەملەكەتتىڭ» جۇمىس ىستەپ تۇرعانىن ايعاقتايدى»، - دەيدى ول.