جامبىلدا يگەرىلمەگەن ەگىس القاپتارى مەملەكەت مەنشىگىنە قايتارىلىپ جاتىر

ال 7197 گەكتار ەگىستىكتى پايدالانۋشىلارعا جەر سالىعى ون ەسەگە دەيىن ۇلعايتىلىپتى. بۇل تۋرالى بۇگىن وڭىرىلىك كوممۋنيكاتسيالار قىزمەتىندە وتكەن بريفينگتە وبلىستىق جەر قاتىناستارى باسقارماسىنىڭ باسشىسى باحتيار كوپبوسىنوۆ باياندادى.

سپيكەردىڭ ايتۋىنشا، وڭىردە بارلىق باعىتتاعى جەرلەرگە بولجامدى كوسمومونيتورينگ ياعني اۋە ارقىلى باقىلاۋ جۇرگىزىلگەن. ناتيجەسىندە 25 مىڭ گەكتار ەگىستىك جەرلەردىڭ يگەرۋسىز قالعانى انىقتالدى.

بۇل كورسەتكىش 2019-جىلمەن سالىستىرعاندا ءبىرشاما تومەندەگەن. ماسەلەن، سول جىلى وبلىس اۋداندارىندا 35,5 مىڭ گەكتار ەگىستىك جەرلەر يگەرۋسىز قالعان دەسەك، سوعان سايكەس قاتاڭ شارالار قولدانۋعا تۋرا كەلگەن.

قولعا العان شۇعىل شارالاردان كەيىن يگەرىلمەگەن ەگىستىكتىڭ 2503 گەكتارى مەملەكەت مەنشىگىنە قايتارىلعان. ال 7197 گەكتار ەگىستىكتى پايدالانۋشىلارعا جەر سالىعى ون ەسەگە دەيىن ۇلعايتىلعان.

«جالپى جامبىل وبلىسىنىڭ جەر قورى 14 427,7 مىڭ گەكتاردى قۇرايدى. بۇل رەسپۋبليكا اۋماعىنىڭ 5,3 پايىزى. ونىڭ ىشىندە ەڭ اۋقىمدى القاپ - اۋىل شارۋاشىلىق ماقساتىنداعى جەرلەر. ايماقتا يگەرۋسىز قالعان القاپتاردى اۋىل شارۋاشىلىق اينالىمىنا قايتا قوسۋ قولعا الىنعان. ايتالىق، 2019-جىلى 199,1 مىڭ گەكتار جەر قايتا قولدانۋعا بەرىلدى. وسى ماقساتتا وتكەن جىلى 18 كونكۋرس وتسە، بيىل 100 مىڭ گەكتار اينالىمعا قوسىلادى. وسى جىلى وبلىستا 19 كونكۋرس وتكىزىلىپ، 117,2 مىڭ گەكتار اۋىل شارۋاشىلىق جەرلەر قايتا اينالىمعا قوسىلادى»، - دەدى باسقارما باسشىسى.

ايتا كەتۋ كەرەك، ايماقتا بىلتىر بوس جەرلەر بويىنشا 25 اۋكتسيون وتكەن. وعان 74 گەكتار جەر شىعارىلىپ بيۋجەتكە 196,4 ميلليون كولەمىندە كىرىس كەلگەن.