قازاقستاندا كوپبالالى وتباسىلاردى قولداۋعا قارجىلاندىرۋ ۇلعايتىلدى

بۇل تۋرالى ەڭبەك جانە حالىقتى الەۋمەتتىك قورعاۋ مينيسترلىگىنىڭ القا ماجىلىسىندە ۆەدومستۆو باسشىسى سەرىك شاپكەنوۆ ءمالىم ەتتى، دەپ حابارلايدى قازاقپارات ءتىلشىسى.

مينيستر ءوز سوزىندە قازاقستاندا بالالى وتباسىلاردى الەۋمەتتىك قولداۋعا ەرەكشە نازار اۋدارىلاتىنىن باسا ايتتى.

«ەلىمىزدە جىل سايىن 400 مىڭنان استام بالا دۇنيەگە كەلەدى. انا مەن بالانى قولداۋ ءۇشىن رەسپۋبليكالىق بيۋدجەتتەن جانە مەملەكەتتىك الەۋمەتتىك ساقتاندىرۋ قورىنان (م ءا س ق) ءبىرقاتار الەۋمەتتىك تولەمدەر كوزدەلگەن. 2020 -جىلى شامامەن 1,9 ميلليون ادام بالالى وتباسىلاردى قولداۋعا باعىتتالعان سوماسى 635,3 ميلليارد تەڭگەگە 8 ءتۇرلى جاردەماقى مەن تولەم الدى، بۇل 2019 -جىلعى تولەمدەر سوماسىنان 71 پايىزعا جوعارى. 2021 -جىلعا وسى ماقساتقا 755,4 ميلليارد تەڭگە، ونىڭ ىشىندە بيۋدجەتتەن 501,7 ميلليارد تەڭگە جانە م ءا س ق- تان 253,7 ميلليارد تەڭگە كوزدەلگەن»، - دەدى س. شاپكەنوۆ.

سونىمەن قاتار مينيستر ەلدىڭ بارلىق وڭىرىندە جۇمىسپەن قامتۋ، وقىتۋ جانە باسقا دا ماسەلەلەر بويىنشا كومەك كورسەتۋ ءۇشىن وتباسىن قولداۋعا ارنالعان 31 ورتالىق اشىلعانىن جەتكىزدى. ەستەرىڭىزگە سالا كەتەيىك، رەسپۋبليكالىق بيۋدجەتتەن مىناداي جاردەماقىلار تولەنەدى:

بالا تۋعاندا بەرىلەتىن بىررەتتىك جاردەماقى؛

بالا 1 جاسقا تولعانعا دەيىن ونىڭ كۇتىمى بويىنشا اي سايىنعى جاردەماقى؛

«التىن القا»، «كۇمىس القا» القالارىمەن ماراپاتتالعان نەمەسە بۇرىن «باتىر انا» اتاعىن العان، I جانە II دارەجەلى «انا داڭقى» وردەندەرىمەن ماراپاتتالعان كوپبالالى انالارعا اي سايىنعى جاردەماقى؛

كوپبالالى وتباسىلارعا بەرىلەتىن مەملەكەتتىك جاردەماقى؛

مۇگەدەكتىگى بار بالانى تاربيەلەپ وتىرعان ادامدارعا اي سايىنعى جاردەماقى؛

18 جاستان اسقان ءبىرىنشى توپتاعى مۇگەدەكتىگى بار ادامعا كۇتىم كورسەتۋ بويىنشا اي سايىنعى جاردەماقى. مىندەتتى الەۋمەتتىك ساقتاندىرۋ جۇيەسىنە قاتىسۋشى بولىپ سانالاتىن جۇمىس ىستەيتىن ايەلدەر ءۇشىن م ءا س ق- تان: جۇكتىلىك جانە بوسانۋ ءۇشىن ءبىرجولعى جانە بالا 1 جاسقا تولعانعا دەيىن ونىڭ كۇتىمى بويىنشا اي سايىنعى تولەم تولەنەدى. بۇدان باسقا، جۇمىس ىستەيتىن ايەلدەرگە 1 جاسقا دەيىنگى بالا كۇتىمى بويىنشا دەمالىس كەزەڭىندە مىندەتتى زەينەتاقى جارناسى سۋبسيديالانادى.

اۆتور: رۋسلان عابباسوۆ