جاڭا كولىكتەردى قاي ءوڭىر تۇرعىندارى كوپ مىنەدى

بۇل تۋرالى ق ر يندۋستريا جانە ينفراقۇرىلىمدىق دامۋ مينيسترلىگىنەن ءمالىم ەتتى، دەپ حابارلايدى قازاقپارات.

قازاقستاندا 870318 جەڭىل اۆتوكولىك بار. ونىڭ 64,5 پايىز - شىعارىلعانىنا 10 جىلدان اسقان. 2015 -جىلى ولاردىڭ ۇلەسى 72,5 پايىز ەدى. سودان بەرى بۇل كورسەتكىشتى تومەندەتۋ ءۇشىن ەلىمىزدە قايتا وڭدەۋگە تولەم ەنگىزۋ جانە جەڭىلدەتىلگەن اۆتونەسيە تۇرىندە مەملەكەتتىك ىنتالاندىرۋ شارالارى قولدانىلدى.

ناتيجەسىندە ەسكى كولىكتەر سانى 8 پايىز ازايدى. 10 جىلدان اسقان اۆتوكولىكتەر الماتى وبلىسىندا ەڭ كوپ تىركەلگەن (بارلىق ەسكى اۆتوكولىكتەردىڭ 15,5 پايىز نەمەسە 385720 بىرلىك). ەڭ ازى - اتىراۋ وبلىسىندا (1,5 پايىز نەمەسە 36945 بىرلىك). شىعارىلعانىنا 3 جىلدان اسپاعان جاڭا اۆتوكولىكتەر نۇر-سۇلتان (بارلىق جاڭا اۆتوكولىكتەردىڭ سانىنان 13,7 پايىز نەمەسە 63266 بىرلىك) جانە الماتى (16,9 پايىز نەمەسە 78079 بىرلىك) قالالارىندا ەڭ كوپ تىركەلگەن. جاڭا اۆتوكولىكتەر جامبىل (1,8 پايىز نەمەسە 8111 بىرلىك) جانە تۇركىستان وبلىستارىندا (1,9 پايىز نەمەسە 8877 بىرلىك) از.