الاپات ورتپەن ارپالىسقان قۇتقارۋشى: كيىمىمىز جانىپ، كاسكامىز بالقىسا دا دامىل تاپپادىق

جۇرتتىڭ جۇرەگىن ەلجىرەتكەن وسى ۆيدەوداعىلاردىڭ ءبىرى - 14№ ءورت ءسوندىرۋ بولىمشەسى باستىعىنىڭ ورىنباسارى ۇلان نۇرمۇحامبەت.

قازاقپارات ءتىلشىسى ازاماتتىق قورعانىس اعا لەيتەنانتىمەن سۇحباتتاسىپ، تالايدى تىعىرىققا تىرەگەن ءتىلسىز جاۋمەن قالاي كۇرەسكەندەرىن سۇراپ كوردى.

- ش ق و - قۇتقارۋشىلاردىڭ قاتارىن تولىقتىرعانىڭىزعا قانشا جىلدىڭ ءجۇزى بولدى؟

- 1990-جىلى 10- اقپان كۇنى شىعىس قازاقستان وبلىسى كاتونقاراعاي اۋدانى توپقايىڭ اۋىلىندا جارىق دۇنيە ەسىگىن اشتىم. 2012-جىلى وتان الدىنداعى بورىشىمدى ەلورداداعى 36-دەسانتتىق- شابۋىل بريگاداسىندا وتەدىم. اسكەردەن كەلگەننەن كەيىن ريددەر قالاسىنداعى 1№ مامانداندىرىلعان ءورت ءسوندىرۋ بولىمىنە جۇمىسقا ورنالاستىم.

بۇل 2013-جىلدىڭ قاڭتار ايى بولاتىن. 4 جارىم جىلداي ءورت ءسوندىرۋشى بولىپ تەر توككەننەن كەيىن اقتوبە قالاسىندا 3 ايلىق وفيتسەرلىك كۋرسقا بارىپ ءبىلىم الدىق. وسىدان كەيىن قاراۋىل باستىعى بولىپ، كەيىننەن ءبولىم باستىعىنىڭ ورىنباسارى قىزمەتىنە تاعايىندالدىم. قازىرگى ۋاقىتتا 14№ ءورت ءسوندىرۋ ءبولىمى باستىعىنىڭ ورىنباسارى بولىپ ەڭبەك ەتىپ كەلەمىز.

- ورماندا شىعىپ، جەر ۇيلەرگە تاراعان الاپات ورتپەن قالاي كۇرەسكەندەرىڭىزدى ايتىپ بەرسەڭىز.

- ءورت 10- مامىر كۇنى ءتۇس كەزىندە ريددەر ورمان شارۋاشىلىعىندا شىقتى. نەگىزىنەن بۇل 1№ مامانداندىرىلعان ءورت ءسوندىرۋ بولىمىنە قاراستى اۋماق. سول ءبولىمنىڭ قۇتقارۋشىلارى ءتىلسىز جاۋدىڭ بەتىن قايتارا الماعاندىقتان بىزدەن كومەك سۇرادى. ساعات 14:30 شاماسى. بولىمدەگى جىگىتتەر كولىككە ءمىنىپ، شۇعىل اتتاندى.

15:00 گە قاراي ءوزىم دە وقيعا ورنىنا جەتتىم. ول كەزدە جالىن جەر ۇيلەرگە تاراپ كەتكەن.

سوسنوۆىي بور كوشەسىندەگى وتقا ورانعان 4 ءۇيدى كوردىم. جەل سوعىپ تۇر. اينالانى تۇگەل ءتۇتىن تۇمشالاپ العان. ەسىكتەردى قاعىپ حالىققا «سىرتقا شىعىڭدار! ءورت كەلە جاتىر!» دەپ ايقايلادىق.

جىگىتتەرگە «جالىندى كوشەنىڭ سول جاعىنا شىعارماڭدار» دەپ تاپسىرما بەردىم. ءورتتى ۇستاپ تۇرۋ قيىنعا سوقسا دا بۇل مىندەت ءساتتى ورىندالدى. كەنەت تۇرعىنداردىڭ ءبىرى «ۇيدەن شىقپايمىن! گاراجدا جۇك كولىگىم تۇر. ونسىز ەشقايدا دا بارمايمىن» دەدى. ال ءتۇسىندىرىپ كور!

قانشا ايتساق تا تىڭدار ەمەس. سودان سوڭ كولىكتى قاۋىپسىز جەرگە الىپ شىقتىق. ورتپەن كۇرەس ءبىر ساتكە دە توقتامادى. ۇيلەردەن 10 عا جۋىق گاز باللونىن سىرتقا شىعارىپ ۇلگەردىك. قۇتقارۋشىلاردىڭ كيىمدەرى جانىپ، كاسكالارى بالقىپ، ءبىر بىرىنە سۋ شاشتى. ءبىرازدان سوڭ وسكەمەن قالاسىنان قوسىمشا كۇش كەلىپ جەتتى.

«كازتسينك»، «ۆودوكانال» مەكەمەلەرىنىڭ سۋ تاسۋشى كولىكتەرى دە جۇمىلدىرىلدى.

- وسىنداي سىن ساعاتتا ەڭ اۋەلى نە ويلادىڭىز؟

- شىنىمدى ايتسام، ويلانۋعا ۋاقىت بولمادى. تەك ارەكەت. ءتىلسىز جاۋمەن تەكەتىرەستە ءار سەكۋندتىڭ ماڭىزى زور. ءورتتىڭ ءورشۋى - قاس-قاعىمدا. اكەم ورمان شارۋاشىلىعىندا ورمانشى بولىپ جۇمىس ىستەيدى. كەيىننەن جالىننىڭ بەتى قايتا باستاعان كەزدە ەڭ اۋەلى «اكەم امان-ەسەن بە ەكەن، بىردەڭە بولىپ قالماسا يگى ەدى» دەگەن وي سانامدا سارناپ قويا بەردى.

- كۇندىز-ءتۇنى ورتپەن كۇرەسكەندە مۇلدە ءنار تاتپادىڭىزدار ما؟

- ۇيلەر وتقا ورانىپ جاتقاندا اس ءىشىپ وتىرمايسىڭ عوي. اراسىندا تاماعىمىزدى ءجىبىتۋ ءۇشىن سۋ ۇرتتاپ قويامىز. ءتۇن جارىمىندا دا ەش توقتاۋسىز ءورتتى وشىرۋمەن بولدىق. تەك كەلەسى كۇنى تۇسكە قاراي جالىندى جەڭىپ بولعان سوڭ جەرگىلىكتى اتقارۋشى ورگان قىزمەتكەرلەرى مەن ۆولونتەرلەر اكەلگەن تاماقتان ءدام تاتتىق. ابدەن قالجىراپ، قول-اياعىمىز سىزداپ تۇر. ءبىر جاعىنان ۇيقى دا قىسىپ بارادى. ءسويتىپ، 20 مينۋتتاي مىزعىپ الدىق.

مىنە، وسى كەزدە ءبىزدى ۆيدەوعا ءتۇسىرىپ الىپ، جەلىگە جۇكتەپ جىبەرىپتى. ونى ارتىنان ەستىدىك. كىم تۇسىرگەنىن بىلمەيمىن. ەل-جۇرتتىڭ ريزاشىلىقتارىن ءبىلدىرىپ، العىستارىن جاۋدىرىپ جاتقانىن كورگەندە كەۋدەمىزدى قۋانىش كەرنەپ، بۇل سالاعا بەكەر كەلمەگەنىمىزدى تۇسىنگەندەيمىز.

- وتباسىڭىز جايلى ايتىپ وتسەڭىز؟

- ايەلىم، ەكى بالام بار. قۇداي قوسقان قوساعىم ايدانا ريددەردەگى 1№ مامانداندىرىلعان ءورت ءسوندىرۋ بولىمىندە فەلدشەر بولىپ جۇمىس ىستەيدى. ۇلىم يسلام 4 جاستا، ال قىزىم اسىلىم 2 گە تولدى.

- ۇلىڭىز وسكەندە ءورت ءسوندىرۋشى بولعىسى كەلەتىندىگىن ايتسا قولدار ما ەدىڭىز؟

- ارينە، قولدايمىن. ادام ءومىرىن العاش قۇتقارعان كەزدە ەرەكشە سەزىمدە بولادى ەكەنسىڭ. بۇنى سوزبەن ايتىپ جەتكىزۋ مۇمكىن ەمەس. وسى ومىرگە بوسقا كەلمەگەنىڭدى سەزىپ، ءوز ورنىڭدى تاپقانىڭدى تۇيسىنەسىڭ. بالامنىڭ ماڭدايىنا دا سول ءبىر ەكىنىڭ بىرىنە بۇيىرتپايتىن ەرەكشە اسەرگە بولەنۋدى جازسا قالاي قارسى بولايىن؟ وعان اركەز اقىلىمدى ايتىپ، قولداۋ كورسەتۋگە ءازىرمىن.

- اڭگىمەڭىزگە كوپ راحمەت!

اۆتور: تالعاتجان مۇحامەتبەك ۇلى