تۇركىستاندا ەلىمىزدەگى ەڭ ءىرى اۋرۋحانالاردىڭ ءبىرى سالىنۋدا

None
None
تۇركىستان. قازاقپارات - تۇركىستاندا ەلىمىزدەگى ەڭ ءىرى اۋرۋحانالاردىڭ ءبىرى سالىنۋدا. 8 قاباتتى كوپسالالى مەديتسينالىق ورتالىقتىڭ قۇرىلىسى 16 گەكتار جەردى الىپ جاتىر، دەپ حابارلايدى قازاقپارات ءتىلشىسى.

570 توسەك- ورىنعا شاقتالعان زاماناۋي ەمدەۋ كەشەنى قازاقستاندا جوسپارلانعان ءىرى جيىرما اۋرۋحانانىڭ العاشقىسى سانالادى. ينۆەستيتسيالىق جوبانى دەنساۋلىق ساقتاۋ مينيسترلىگى ارقىلى مەملەكەتتىك - جەكەشەلىك ارىپتەستىك اياسىندا YDA Group تۇرىك ينۆەستورى جۇزەگە اسىرۋدا. نىساننىڭ قۇنى 200 ميلليارد تەڭگەدەن اسادى.


2019 - جىلى باستالعان قۇرىلىستى 2022 - جىلعا قاراي اياقتاۋ جوسپارلانۋدا. وڭىردەگى عانا ەمەس، رەسپۋبليكاداعى ەڭ ءىرى مەديتسينالىق مەكەمەلەردىڭ ءبىرى بولاتىن اۋرۋحانانىڭ جالپى اۋدانى 80 مىڭ شارشى مەتردەن اسادى. الەمدىك ستاندارتتارعا ساي سالىنىپ جاتقان اۋرۋحانا تولىق پايدالانۋعا بەرىلگەننەن كەيىن 2000-نان استام مەديتسينا قىزمەتكەرى تۇراقتى جۇمىسپەن قامتىلادى.


جوباعا سايكەس، مۇندا 13 بەيىندى بولىمشە مەن جۇرەك- قان- تامىر جانە كورونارلىق رەانيماتسيا، گەماتولوگيا، ونىڭ ىشىندە كۇيىكپەن ەمدەۋدىڭ 2 قارقىندى تەراپياسى (ICU) بولىمشەلەرى اشىلماق. بۇدان باسقا، كوپسالالى اۋرۋحانا قابىرعالارىندا 16 وپەراتسيالىق بولمە، ونىڭ ىشىندە 13 جوسپارلى جانە 3 شۇعىل كومەك جۇمىس ىستەيتىن بولادى.

كەشەندە بارلىعى 11 بلوك بار، ولاردىڭ 9-ىندا مونوليتتى جۇمىستار جۇرگىزىلۋدە. نىساندى سالۋعا 100-دەن استام قۇرىلىسشى جۇمىلدىرىلعان. 4 مۇنارا كرانى مەن 12 تەحنيكا تارتىلعان.

اۆتور: اينۇر اقبايەۆا


سوڭعى جاڭالىقتار