مەملەكەتتىك قولداۋ شارالارى نارىقتىق مەحانيزمدەرگە جول بەرۋى كەرەك - توقايەۆ
بۇل تۋرالى مەملەكەت باسشىسى قاسىم-جومارت توقايەۆ ۇلتتىق بانكتىڭ ەسەبىن قابىلداعان كەزدە ايتتى، دەپ حابارلايدى قازاقپارات.
«پاندەميا كەزىندە ۇكىمەت مەنىڭ تاپسىرمام بويىنشا جالپى ەكونوميكانى، ونىڭ ىشىندە، شاعىن جانە ورتا بيزنەستى قولداۋ ءۇشىن تەڭدەسسىز شارالار قابىلدادى. قۇنى 15 ميلليارد دوللار بولاتىن داعدارىسقا قارسى شارالاردىڭ 3 توپتاماسى جۇزەگە اسىرىلدى. ارينە، مەملەكەتتىڭ بيزنەستى ۇنەمى قارجىلاندىرا المايتىنىن تۇسىنگەن ءجون. ۇلتتىق بانكتىڭ بەلسەندى اتسالىسۋى ەكونوميكالىق بەلسەندىلىك پەن ەكىنشى دەڭگەيدەگى بانكتەردىڭ بەلسەندىلىگىن قايتا قالپىنا كەلتىرۋگە ىقپال ەتۋى ءتيىس. سوندىقتان نەسيەلەۋدىڭ جەڭىلدەتىلگەن باعدارلاماسىنىڭ اياقتالۋىنا وراي مەملەكەتتىك قولداۋ شارالارى نارىقتىق مەحانيزمدەرگە جول بەرۋى كەرەك. مۇنى الەۋمەتتىك-ەكونوميكالىق احۋالدى ەسكەرە وتىرىپ، بىرتىندەپ اتقارۋ قاجەت»، - دەدى پرەزيدەنت.