نۇر- سۇلتاندا جاستارعا ارنالعان تۇرعىن ءۇي باعدارلاماسى ىسكە قوسىلادى

None
None
نۇر- سۇلتان. قازاقپارات - نۇر- سۇلتان قالاسىنىڭ اكىمى التاي كولگىنوۆ Instagram پاراقشاسىندا جاستاردىڭ باسپانا ماسەلەسى قانداي جولمەن شەشىلىپ جاتقانىن ءتۇسىندىرىپ ءوتتى، دەپ حابارلايدى ەلوردا اكىمدىگىنىڭ رەسمي سايتى.

«قالانى دامىتۋدىڭ جانە ءومىر سۇرۋگە قولايلى جاعداي جاساۋدىڭ نەگىزگى ماسەلەلەرىن تالقىلادىق. قىسقاشا ەكى باعىتقا توقتالعىم كەلەدى: «Elorda Jastary» جاستار باعدارلاماسى جانە ەرەكشە قاجەتتىلىگى بار ادامدار ءۇشىن جاعداي جاساۋعا باعىتتالعان. وتكەن جىلى ۆولونتەرلەرمەن، جاستار ۇيىمدارىنىڭ وكىلدەرىمەن كەزدەسۋلەردە «Elorda Jastary» باعدارلاماسىنىڭ تۇجىرىمداماسىن ازىرلەدىك. وندا كورسەتىلگەن نەگىزگى باعىتتار: ساپالى جانە قولجەتىمدى ءبىلىم بەرۋ، جۇمىسقا ورنالاسۋعا جانە جاستار كاسىپكەرلىگىن دامىتۋعا كومەك كورسەتۋ، كاسىپتىك باعدارلاۋ، بوس ۋاقىتتى ءتيىمدى وتكىزۋ، سالاۋاتتى ءومىر سالتىن ناسيحاتتاۋ جانە ت. ب.

مەملەكەت باسشىسىنىڭ تاپسىرماسى بويىنشا «Elorda Jastary» باعدارلاماسىنىڭ نەگىزگى باعىتى - تۇرعىن ءۇي ماسەلەسى. وسى جىلى ەلوردانىڭ جاس ماماندارىن جەڭىلدىكپەن الەۋمەتتىك نەسيەلەندىرۋدىڭ جاڭا تۇرعىن ءۇي باعدارلاماسىن ىسكە قوسۋدى جوسپارلاپ وتىرمىز. بۇل باعدارلاماعا 36 جاسقا دەيىنگى جاستار قاتىسا الادى (جۇبايىنىڭ/زايىبىنىڭ جاسى ماڭىزدى ەمەس). ەلوردالىق تىركەلىم كەم دەگەندە ءبىر جىل بولۋى كەرەك جانە باعدارلاما ۇمىتكەرىنىڭ جەكە باسپاناسى بولماۋى كەرەك. رەسمي جۇمىس ءوتىلى 1 جىلدان كەم ەمەس بولۋى شارت. وسىلايشا اتالعان تۇرعىن ءۇي باعدارلاماسىنا قاتىسۋشى تۇرعىن ءۇي ساتىپ الۋعا 13 ميلليون تەڭگەگە دەيىن قارىز الا الادى (جىلدىق % 5 جەڭىلدىكپەن). ساتىپ الىناتىن تۇرعىن ءۇيدىڭ قۇنى شەكتەۋسىز.

سونىمەن قاتار وسى جىلى ەلباسىنىڭ باستاماسىمەن قولعا الىنعان «جۇمىس ىستەيتىن جاستارعا ارنالعان جالعا بەرىلەتىن تۇرعىن ءۇي» باعدارلاماسى دا جالعاسادى. وسى باعدارلاما اياسىندا جىل سوڭىنا دەيىن تاعى 1 مىڭنان استام جاستار باسپانالى بولادى. ەكىنشى باعىت - مۇمكىندىگى شەكتەۋلى جاندارعا جاعداي جاساۋ. قالادا ءبىرقاتار الەۋمەتتىك جوبالار، سونىڭ ىشىندە «كەدەرگىسىز كەلەشەك» جوباسى جۇزەگە اسىرىلۋدا. وسى جوبا جەلىسى بويىنشا 12 بەيىمدەۋ سەكسياسى اشىلدى، رەسپۋبليكالىق كلينيكالارعا كۆوتالار ءبولىندى، مۇگەدەكتەر اربالارى جانە ت. ب. سىيعا تارتىلدى.

سونىمەن قاتار قالادا ءبىرقاتار الەۋمەتتىك نىساندار سالىنۋدا: وڭالتۋ ورتالىقتارى، كورۋ قابىلەتى بۇزىلعان بالالارعا ارنالعان بالاباقشا، پاراليمپيادالىق جاتتىعۋ ورتالىعىمەن بىرلەسىپ، مۇمكىندىگى شەكتەۋلى ادامدارعا ارنالعان سپورت كەشەنىن سالامىز. مىسالى، وتكەن جىلى تۇڭعىش پرەزيدەنت قورى مەن «سامۇرىق- قازىنا» قورىنىڭ قولداۋىمەن №1 قالالىق بالالار اۋرۋحاناسى بازاسىندا «قامقورلىق» وڭالتۋ ورتالىعى اشىلدى. سونداي- اق بتسپ، اۋتيزم، داۋن سيندرومى جانە ت. ب. دياگنوزى بار بالالاردى وڭالتۋمەن اينالىساتىن ءبىرقاتار وڭالتۋ ورتالىقتارى اشىلدى»، - دەپ جازدى ەلوردا اكىمى.

سوڭعى جاڭالىقتار