ۆاكسينا الماڭىزدار دەۋ - بۇل ولىمگە شاقىرۋ - يتاليا پرەمەر- ءمينيسترى ۆاكسيناعا قارسى ادامدارعا سىن ايتتى

None
None
بريۋسسەل. قازاقپارات - يتاليا ۇكىمەتى وسى اپتادا بەكىتكەن جاڭا ەرەجەلەر ەلدىڭ كوپتەگەن مەملەكەتتىك مەكەمەلەرىندە ۆاكسينالاۋ تۋرالى سەرتيفيكاتتىڭ بولۋىن مىندەتتەيدى، دەپ حابارلايدى قازاقپارات.

يتاليانىڭ پرەمەر- ءمينيسترى ماريو دراگي ۆاكسيناعا قارسى يدەيالاردى ناسيحاتتايتىن ادامدار «ولىمگە شاقىرعانمەن» بىردەي دەپ مالىمدەدى.

«ۆاكسينا الماڭىزدار دەۋ - بۇل ولىمگە شاقىرۋ. ەگەر ءسىز ۆاكسينا الماساڭىز، ءسىز اۋىراسىز، ولەسىز. نەمەسە ءسىز ولتىرەسىز: ۆاكسينا المايسىز، اۋىراسىز، باسقالارعا جۇقتىراسىز، بىرەۋ ولەدى»، - دەدى م. دراگي باسپا ءسوز ءماسليحاتىندا.

سونداي- اق COVID-19 دەلتا نۇسقاسىنىڭ تارالۋىنا قارسى تۇرۋعا كومەكتەسەتىن جاڭا شەكتەۋلەر جاريالادى.

- ۆاكسيناسىز ءبارى قايتادان جابىلۋى مۇمكىن. ۆاكسينا تارالۋدا جانە وسى قورعانىس ارقىلى ءبىز اۋرۋحاناعا جاتقىزۋ جانە ءولىم- ءجىتىم دەڭگەيى الدەقايدا تومەندەگەنىن بايقايمىز»، - دەپ جالعاستىردى يتاليا پرەمەر- ءمينيسترى.

يتاليا بۇقارالىق اقپارات قۇرالدارىنىڭ حابارلاۋىنشا، م. دراگيدىڭ جوعارىدا ايتىلعان مالىمدەمەلەرى «ليگانىڭ» وڭشىل پارتياسىنىڭ جەتەكشىسى ماتتەو سالۆينيدىڭ ايتقاندارىنا جاۋاپ بولدى. ول سوڭعى كۇندەرى جاستارعا ۆاكسينا الۋدىڭ قاجەتى جوق جانە 40-59 جاستاعى ادامدار ينەكسيا جاساۋدى ەركىن شەشە الادى دەگەن بولاتىن.

بەيسەنبىدە يتاليا ۇكىمەتى بەكىتكەن جاڭا ەرەجەلەر 6- تامىزدان باستاپ مەيرامحانالار، بارلار، اشىق اسپان استىنداعى شوۋلار، ساناتورييلەر، باسسەيندەر، سپورت زالدارى، جارمەڭكەلەر، كونگرەستەر مەن جارىستاردى قوسا العاندا، كوپتەگەن قوعامدىق مەكەمەلەردە ۆاكسينالاۋ تۋرالى سەرتيفيكاتتى مىندەتتى تۇردە قولدانۋدى ەنگىزدى. سەرتيفيكات ۆاكسينا العان ادامدار ءۇشىن، سونداي- اق ۆاكسينانىڭ ءبىر دوزاسىن عانا العان ادامدار جانە سوڭعى 48 ساعات ىشىندە تەرىس سىناق كورسەتە الاتىندار ءۇشىن جارامدى. يتاليا ۇكىمەتى توتەنشە جاعدايدى 2021 -جىلدىڭ سوڭىنا دەيىن ۇزارتتى.

اۆتور: گۇلزات اقجولوۆا

سوڭعى جاڭالىقتار