ەرلان سايروۆ: حالىق اكىم سايلاۋىندا جاستارعا باسىمدىق بەردى

None
None
نۇر- سۇلتان. قازاقپارات - اكىم سايلاۋى وتكەن اۋىلداردىڭ كوبىندە ناۋقان الدىندا وزىندىك «پرايمەريز» وتكەن. ءماجىلىس دەپۋتاتى، ۇلتتىق قوعامدىق سەنىم كەڭەسىنىڭ مۇشەسى ەرلان سايروۆ كەشەگى وتكەن سايلاۋدان وسىنداي وي ءتۇيىپ قايتقان، دەپ حابارلايدى قازاقپارات ءتىلشىسى.

«بۇل ءبىزدىڭ ەلىمىزدىڭ ساياسي تاريحىنداعى ۇلكەن ءبىر بەلەس دەپ ايتۋعا ۇلكەن نەگىز بار. 30 جىلدىڭ ىشىندە قازاقستان حالقى ءوزىنىڭ اكىمدەرىن تىكەلەي سايلاپ الۋ قۇقىعىنا يە بولىپ وتىر. بۇل بىرىنشىدەن، حالقىمىزدىڭ ساياسي مادەنيەتىن وسىرۋگە الىپ كەلەدى. ەكىنشىدەن، ايماقتاردا ساياسي پليۋراليزمنىڭ دامۋىنا وتە تەرەڭ ىرگەتەس قالايتىنى انىق. 15 كۇندەي ايماقتاردى ارالاپ قايتتىق. سول كەزدە اۋىل اكىمدەرىن سايلاۋ پروتسەسىنە جان- جاقتى ساراپتاما جاسادىق. حالىقتىڭ قىزىعۋشىلى وتە جوعارى. شىنىن ايتۋ كەرەك، قازاق ءوز تاعدىرىنا كەلگەندە وتە جاۋاپتى قارايدى»، - دەيدى دەپۋتات.

ۇلتتىق كەڭەس مۇشەسى مۇنداي قىزىعۋشىلىق، مەنىڭ ويىمشا، ءتىپتى پارلامەنت سايلاۋى كەزىندە دە بولماعانىن ايتادى.

«ويتكەنى اۋىل ازاماتتارى اكىمگە داۋىس بەرۋ ارقىلى ءوزىنىڭ بولاشاعىن، اۋىلدىڭ دامۋ جولىن سايلايتىنىن تۇسىنگەندىكتەن، بۇل ناۋقانعا وتە جاۋاپتى كەلدى. سونىمەن بىرگە، كانديداتتارعا دەگەن نازارى دا ەرەكشە بولدى. مەنىڭ تۇسىنگەنىم، ءوز ىشتەرىنەن كانديدات ۇسىنباس بۇرىن ءاربىر اۋىلدا وزىنشە ءبىر پرايمەريز بولعان. ياعني، كىم لايىقتى دەگەن ماسەلەدەن باستاعان سايلاۋعا جۇمىلۋدى. لايىقتى ادامداردىڭ ىشىندە دە سۇرىپتاۋ بولعان. قازىر ايتىپ جاتىرمىز عوي، 2298 كانديدات بولدى دەپ. نەگىزىندە كانديداتتاردىڭ ءتىزىمى 5-6 مىڭنان دا اسقان. سونىڭ ىشىندە ىرىكتەلگەندەرى عانا تىركەۋگە قاتىسقان»، - دەيدى ءماجىلىس وكىلى.

ەرلان سايروۆ وسى سايلاۋدا اۋىل حالقىنىڭ جاستارعا ءۇمىت ارتاتىنىن ايرىقشا بايقاعانىن ايتادى. «تاعى ءبىر ەرەكشەلىگى، سايلاۋشىلاردىڭ وزدەرى جاستارعا ورىن بەرۋىمىز كەرەك دەگەن تالاپتى العا تارتتى. مەنى سول تاڭعالدىردى. ياعني، حالىقتىڭ ءوزى جاستار ىستەسىن دەگەن تالاپ قويىپ، شەك بەلگىلەپ تاستاعان. بۇل ەش جەردە جازىلعان زاڭ بولماسا دا، ىشكى ۇستانىمدارىن وسىلاي قالىپتاستىرعان. مىسالى، كەشە مەن ماڭعىستاۋ وبلىسىنىڭ ءتۇپقاراعان اۋدانىنداعى اقشۇڭقىر اۋىلىندا بولدىم. سول جەردەگى ۇمىتكەر ەركەبۇلان دەگەن جىگىت 32-دە ەكەن. ونىڭ باستى ماقساتى - اقشۇڭقىر اۋىلىنىڭ ينفراقۇرىلىمىن جانىنداعى اقتاۋدىڭ دەڭگەيىنە جەتكىزۋ. مەنىڭ ويىمشا، وسى سايلاۋدان كەيىن اۋىل اكىمدەرىنىڭ جاسى ءبىراز جاسارادى»، - دەيدى ساراپشى.

اۆتور: ەسىمجان ناقتىباي

سوڭعى جاڭالىقتار