قاسىم- جومارت توقايەۆ رەسەيدىڭ استراحان وبلىسىنىڭ گۋبەرناتورىن قابىلدادى

None
None
نۇر- سۇلتان. قازاقپارات - قازاقستان پرەزيدەنتى رەسەيدىڭ استراحان وبلىسىنىڭ گۋبەرناتورى يگور بابۋشكيندى قابىلدادى، دەپ حابارلايدى اقوردا.

كەزدەسۋ بارىسىندا قاسىم- جومارت توقايەۆ قازاقستان مەن رەسەي فەدەراتسياسى اراسىنداعى ستراتەگيالىق جانە وداقتاستىق قاتىناستاردىڭ قارقىندى دامىپ كەلە جاتقانىن جانە ەكى ەل وڭىرلەرىنىڭ ىقپالداستىعى كەڭەيە تۇسكەنىن اتاپ ءوتتى.

وسى رەتتە ءوڭىرارالىق ىنتىماقتاستىق فورۋمى ءتيىمدى ديالوگ الاڭىنا اينالىپ وتىر. قازىرگى ۋاقىتتا اتىراۋ، باتىس قازاقستان، ماڭعىستاۋ جانە قازاقستاننىڭ وزگە دە وبلىستارى استراحان وبلىسىمەن كوپتەگەن باعىت بويىنشا ءوزارا ءتيىمدى كووپەراتسيانى جۇزەگە اسىرۋدا.

ەكونوميكالىق بەلسەندىلىكتىڭ جاڭعىرۋىنا وراي شەكارا ماڭىنداعى ساۋدا قارقىنى بىرتىندەپ قايتا قالپىنا كەلىپ جاتقانى بايقالادى. قازاقستان مەن استراحان وبلىسىنىڭ اراسىن نەگىزگى بايلانىستىرۋشى رەتىندە رەسەي بويىنشا ەڭ كوپ تۇراتىن سول جەردەگى قازاق دياسپوراسى ماڭىزدى ءرول اتقارىپ وتىر.

پرەزيدەنت استراحان قازاقتارىنىڭ تاريحي وتانىمەن رۋحاني بايلانىستارىن نىعايتۋىنا، اتا- بابالارىنىڭ ءتىلى مەن مادەنيەتىن ساقتاۋىنا جان- جاقتى قولداۋ كورسەتىپ جاتقانى ءۇشىن يگور بابۋشكينگە ريزاشىلىعىن ءبىلدىردى. مەملەكەت باسشىسى قازاق حالقىنىڭ بوكەي حان، قۇرمانعازى، دينا نۇرپەيىسوۆا جانە باسقا دا ۇلى پەرزەنتتەرىنىڭ ەسىمىن استراحان جەرىندە ۇلىقتاپ كەلە جاتقانى ءۇشىن ايماق اكىمشىلىگى مەن تۇرعىندارىنا العىس ايتتى.

سوڭعى جاڭالىقتار