08:54, 27 - شىلدە 2021 | GMT +6
عالىمدار جەر بەتىندە جاڭا رەكوردتىق اپتاپ ىستىق بولاتىندىعىن ەسكەرتتى
نۇر-سۇلتان. قازاقپارات - جەر بەتىندە تەمپەراتۋرانىڭ جوعارىلاۋ ءۇردىسى جىلدامداۋدا، بۇل تاياۋ ونجىلدىقتاردا ىستىقتىڭ ۇدەي تۇسۋىنە سوقتىرادى، دەپ حابارلايدى قازاقپارات Axios جاڭالىقتار سايتىنا سىلتەمە جاساپ.
سيۋريحتىڭ جوعارى تەحنيكالىق مەكتەبىنىڭ عالىمدارى اۋا-رايىنىڭ ادەتتەن تىس ىستىق كەزەڭدەرى پارنيكتىك گازداردىڭ بولىنۋىمەن بايلانىستى بولۋى مۇمكىن ەكەنىن انىقتادى. گاز شىعارىندىلارى نەعۇرلىم جوعارىلاعان سايىن اپتاپ ىستىق ۇلعايا بەرمەك.
زەرتتەۋشىلەر سونىمەن بىرگە جەردىڭ ون جىل ىشىندە 0,18 گرادۋسقا دەيىن جىلىناتىنىن كورسەتتى. بۇل تۇجىرىمدار پارنيكتىك گازدار شىعارىندىلارىن ازايتۋ كەرەكتىگىن كورسەتەدى. سونىمەن قاتار، عالىمدار پارنيكتىك گازدار جەردىڭ كليماتىن تەز وزگەرتىپ وتىرعاندىقتان، قازىرگى قولعا الىنىپ جاتقان شارالار جەتكىلىكسىز دەگەن پىكىر ءبىلدىرىپ وتىر.
«الداعى ونجىلدىقتاردا قازىرگى تەمپەراتۋرالىق كورسەتكىشتەردەن الدەقايدا اسىپ تۇسەتىن رەكوردتىق اپتاپ ىستىققا دايىندالۋىمىز كەرەك»، - دەيدى زەرتتەۋگە قاتىسۋشى ەريك فيشەر.