جۇرتتىڭ كوزىنشە ەر ادامدى اتقان ەكىباستۇزدىق سوتتالدى
وعان ق ر ق ك ەكى بابى بويىنشا ايىپ تاعىلدى، دەپ حابارلايدى قازاقپارات Pavlodarnews.kz سايتىنا سىلتەمە جاساپ.
65 جاستاعى زەينەتكەرگە 287-باپ - «قارۋدى، وق-دارىلەردى، جارىلعىش زاتتار مەن جارىلعىش قۇرىلعىلاردى زاڭسىز ساتىپ الۋ، بەرۋ، ساتۋ، ساقتاۋ، تاسىمالداۋ نەمەسە الىپ ءجۇرۋ»، سونداي-اق 99-باپ - «كىسى ءولتىرۋ» بويىنشا ايىپ تاعىلدى.
ەسكە سالا كەتەيىك، 23- اقپان كۇنى ساعات 08:00 دە ەكىباستۇزدا ساتبايەۆ كوشەسىندەگى ءۇيدىڭ اۋلاسىندا بەلگىسىز بىرەۋ قارۋدان وق اتقان. جاراقات العان ەر ادام وقيعا ورنىندا قازا تاپقان.
پاۆلودار وبلىسى قىلمىستىق ىستەر جونىندەگى مامانداندىرىلعان اۋدانارالىق سوتىنىڭ باسپا ءسوز قىزمەتى زەينەتكەردىڭ ق ر ق ك 99-بابىنىڭ 1-بولىگىندە جانە 287-بابىنىڭ 3-بولىگىندە كوزدەلگەن قىلمىستىق قۇقىق بۇزۋشىلىقتار جاساعانى ءۇشىن كىنالى دەپ تانىلعانىن ءمالىم ەتتى.
كەيىنىرەك سوتتالۋشى قارسىلاسىن تەك ەكى رەت - ارتىنان جانە باسىنان اتقانى بەلگىلى بولدى.
پروكۋرور قىلمىستىق كودەكستىڭ ەكى بابى بويىنشا 14 جىلعا باس بوستاندىعىنان ايىرۋدى، ال جابىرلەنۋشىلەر - ۇلى، قىزى جانە جۇبايى ەڭ جوعارى جازا شاراسىن -15 جىل تاعايىنداۋدى جانە ءارقايسىسىنا بەس ميلليون تەڭگە مولشەرىندە مورالدىق زيان ءوندىرىپ الۋدى سۇرادى.
سوتتالۋشى ءوز كىناسىن ءىشىنارا مويىنداپ، كىسى ءولتىرۋ ويى بولماعانىن ءتۇسىندىردى.
جابىرلەنۋشىلەردىڭ ازاماتتىق تالابى ءىشىنارا قاناعاتتاندىرىلىپ، جالپى سوماسى 7 ميلليون تەڭگە ءوندىرىلدى. ۇكىم زاڭدى كۇشىنە ەنگەن جوق.