قازاقستاندا قار بارىستارىن ءوسىرۋ ورتالىعى قۇرىلادى

None
None
الماتى. قازاقپارات- «Snow leopard foundation» حالىقارالىق قورى قازاقستانداعى العاشقى قار بارىستارىن ساقتاۋ، وڭالتۋ جانە ءوسىرۋ ورتالىعىن قۇرۋعا رەسەي، قىتاي مەن قىرعىزستاننان مامانداردى تارتۋعا نيەتتى. بۇل تۋرالى قوردىڭ باسپا ءسوز قىزمەتى ءمالىم ەتتى، دەپ حابارلايدى قازاقپارات ءتىلشىسى.

اتالعان ورتالىق الماتىداعى ىلە- الاتاۋ ۇلتتىق پاركىندە جۇمىس ىستەيتىن بولادى. قازىرگى ۋاقىتتا قور مەن ۇلتتىق پارك اراسىندا عىلىمي قىزمەت تۋرالى شارتقا قول قويىلعان. ورتالىقتى قۇرۋ جوباسى ب ۇ ۇ د ب، ي ۋ ن ە پ، سونداي- اق دۇنيەجۇزىلىك جابايى تابيعات قورىنىڭ (WWF) قاتىسۋىمەن جۇزەگە اسىرىلادى. «Snow leopard foundation» قازاقستان اۋماعىندا ورتالىقتى قۇرۋعا قاتىسۋعا تارتۋ ماقساتىندا كاۆكاز قابىلانى مەن امۋر جولبارىسىنىڭ پوپۋلياتسياسىن ساقتاۋ جانە ۇلعايتۋ ىسىندە تاجىريبەسى بار رەسەي تاراپىمەن كەلىسسوزدەر جۇرگىزدى.

«قىتاي تاراپىنىڭ ىقتيمال قاتىسۋىنا كەلەتىن بولساق، قور بەلگىلى مەتسەنات جانە فيلانتروپ دجەك ما قورىمەن ىنتىماقتاستىقتى تالقىلاۋعا نيەتتى. قىتايلىق ارىپتەستەرگە بىرلەسكەن جۇمىس پەرسپەكتيۆالارىن ودان ءارى تالقىلاۋ ءۇشىن قار بارىستارىن ساقتاۋ جانە ءوسىرۋ ورتالىعى بويىنشا پرەزەنتاتسيا جولداندى»،-دەلىنگەن حابارلامادا.

ورتالىقتىڭ جۇمىسى قار بارىستارىن زەرتتەۋ بويىنشا العاشقى عىلىمي زەرتحانا قۇرۋدى كوزدەيدى. زەرتحانادا عالىمدار ءۇشىن ارنايى ازىرلەنەتىن قوسىمشالارى بار جەكە دەرەكتەر قورى بولادى. بۇل قازاقستانداعى قار بارىستارىنىڭ ەكوجۇيەسىن ەسەپكە الۋ جانە زەرتتەۋ ناتيجەلەرىن جۇيەلەندىرۋگە مۇمكىندىك بەرەدى. دۇنيەجۇزىلىك جابايى تابيعات قورى بۇل باعىتتاعى سەرىكتەس بولماق. بۇگىنگى كۇنى تالعار شىڭىنىڭ ماڭايىندا 3000 مەتر بيىكتىكتە 90 نان استام فوتوتۇزاق ورناتىلىپ، «التىن ەمەل» ساياباعىندا جانە تاعى باسقا 23 قار بارىسىنا ID ءتولقۇجاتتار تاعايىندالدى.

عالىمداردىڭ باعالاۋىنشا، قازىرگى ۋاقىتتا قازاقستاندى 130 عا جۋىق قار بارىسى مەكەندەيدى. قوردىڭ ماقساتى - الداعى 10 جىلدا ونىڭ سانىن كوبەيتۋ. بۇدان بۇرىن مالىمدەلگەندەي، وسىدان 3 اپتا بۇرىن قور جانە زوولوگيا ينستيتۋتىنىڭ عالىمدارى الماتى وبلىسىنىڭ «التىن ەمەل» ۇلتتىق پاركىندە قار بارىستارى بار جاڭا ورتاسىن تىركەدى. بۇعان دەيىن وسى ۇلتتىق پاركتە قار بارىسى بولمادى. ولار 20 - عاسىردىڭ 50- جىلدارىندا ك س ر و كەزىندە- اق جويىلعان بولاتىن.

سوڭعى جاڭالىقتار