اۋىل شارۋاشىلىعى ءمينيسترى ۇن مەن استىق نەگە قىمباتتاعانىن ءتۇسىندىردى

None
None
الماتى. قازاقپارات - اۋىل شارۋاشىلىعى ءمينيسترى ەربول قاراشوكەيەۆ قازاقستاندا ۇن مەن استىق نەگە قىمباتتاعانىن ءتۇسىندىردى.

«بيىل ەگىن بۇرىنعىعا قاراعاندا الدەقايدا تومەن جينالدى. رەسمي تۇلعالار بۇل جاعداي ىشكى نارىققا اسەر ەتپەيدى دەپ سەندىرگەنىمەن، ۇننىڭ، اتاپ ايتقاندا، باتىس قازاقستان، پاۆلودار وبلىستارىندا نان باعاسىنىڭ كوتەرىلگەنىن بايقاپ وتىرمىز. جاعداي بۇدان ءارى قالاي داميدى؟»، - دەپ سۇرادى جۋرناليست وكق بريفينگىندە.

«ءيا، شىنىندا دا بيىل استىق ءتۇسىمى بۇرىنعىعا قاراعاندا تومەن. ءداندى داقىلدار بويىنشا شامامەن 16 ميلليون توننا بولادى دەپ جوسپارلاپ وتىرمىز. ونىمدىلىك 10 سەنتنەر دەڭگەيىندە بولىپ وتىر. بىلتىر ونىمدىلىك 13 سەنتنەر بولدى، 20 ميلليون توننادان استام باستىرىلعان. ءبىراق قازىر جيناعان كولەم ىشكى نارىقتى وتەۋگە جەتكىلىكتى بولادى»، - دەدى قاراشوكەيەۆ.

ول 6-6,5 ميلليون توننا استىق ەكسپورتقا جىبەرىلەدى دەپ بولجادى.

«استىق پەن وڭدەلگەن ۇننىڭ ەكسپورتتىق تاۋار ەكەنىن ەسكەرسەك، باعا الەمدىك باعا كونيۋنكتۋراسىنا بايلانىستى بولادى. ءبىز فاو (بۇۇ ازىق- تۇلىك جانە اۋىلشارۋاشىلىق ۇيىمى) تاماق ونىمدەرى باعاسىنىڭ ءوسۋىن بولجايتىنىن بىلەمىز. وسىعان بايلانىستى باعا ءوسىپ جاتىر»، - دەپ ءتۇسىندىردى مينيستر.

قاراشوكەيەۆ ءونىم قىمباتتاۋىنىڭ ارتىقشىلىقتارىن اتادى.

«ونىمدىلىك تومەن بولعانىن، ال ءبىرقاتار وڭىرلەردە، قوستاناي وبلىسى مەن وڭتۇستىك وبلىستاردا ونىمدىلىك ودان دا تومەن بولعانىن ەسكەرۋ كەرەك. تيىسىنشە، فەرمەرلەر ۇلكەن شىعىنعا ۇشىرادى جانە استىق قۇنى ءوستى. استىق باعاسىنىڭ ءوسۋى فەرمەرلەرىمىزدىڭ، استىق وسىرەتىن كاسىپورىنداردىڭ قارجىلىق جاعدايىنا جاعىمدى اسەر ەتەدى. كەلەر جىلى كوكتەمگى دالا جۇمىستارىن ءساتتى جۇرگىزۋ ءۇشىن ولارعا قارجى كەرەك»، - دەدى ول.

سونداي-اق، مينيستر الەۋمەتتىك نان باعاسىنىڭ كوتەرىلمەۋى ءۇشىن باسقارمانىڭ نە ىستەپ جاتقانىن ايتتى.

«ەل ىشىندە «الەۋمەتتىك« ناننىڭ باعاسى - 50 گرامم ءبىرىنشى سۇرىپتى نان، بۇل ازىق- تۇلىك باعاسىنا ۇلكەن اسەر ەتەدى. باعا تۇراقتىلىعىن قامتاماسىز ەتۋ بويىنشا شارالار قابىلدايمىز. ءبىرىنشى كەزەكتە «الەۋمەتتىك« نان وندىرەتىن كاسىپورىنداردى استىقپەن قامتاماسىز ەتۋ كەرەك»، - دەدى ول.

بۇعان دەيىن پرەزيدەنت قاسىم-جومارت توقايەۆ قازاقستانداعى بيداي ونىمدىلىگى كليماتتىڭ وزگەرۋىنە بايلانىستى تومەندەۋى مۇمكىن دەپ مالىمدەگەن بولاتىن.

«قازاقستان ءىرى بيداي وندىرۋشىلەردىڭ وندىعىنا كىرەدى جانە جىلىنا 7 ميلليون تونناعا دەيىن بيداي ەكسپورتتايدى. الايدا جاعىمسىز سەناري جۇزەگە اسقان جاعدايدا 2030 -جىلعا قاراي بيداي ونىمدىلىگى شامامەن 40 پايىزعا تومەندەۋى مۇمكىن»، - دەدى توقايەۆ قازاقستاننىڭ كومىرتەگى بەيتاراپتىعى تاقىرىبىنداعى حالىقارالىق كونفەرەنسيادا.

سوڭعى جاڭالىقتار