قازاقستاننىڭ حالىق ساناعى قالاي جۇرگىزىلۋدە

بۇل تۋرالى ۇلتتىق ستاتيستيكا بيۋروسىنىڭ باسشىسى نۇربولات ايداپكەلوۆ مالىمدەدى، دەپ حابارلايدى قازاقپارات.

«16-قازاننان باستاپ ساناق ساۋالدارىنا ونلاين رەجيمدە جاۋاپ بەرۋ فۋنكتسياسى توقتاتىلدى. 45 كۇن ىشىندە حالقىمىزدىڭ 40 پروتسەنتكە (%39,6 نەمەسە 7527458 ادام) جۋىعى ساناقتان ءوتۋدىڭ وسى جولىن تاڭدادى. ال ءبىزدىڭ ينتەرۆيۋەرلەر 3 ميلليون 792 مىڭنان اسا اداممەن ساۋالناما جۇرگىزگەن. وسىلايشا، ساناقتان وتكەندەر ۇلەسى 60 پروتسەنتكە جەتتى»، - دەدى بيۋرو باسشىسى.

ونلاين ساناقتان وتپەگەندەر قازاننىڭ 30 ىنا دەيىن ۇيلەردى ارالايتىن ينتەرۆيۋەرلەردىڭ كومەگىمەن شاراعا قاتىسا الادى. ونلاين وتكەندەر ءتيىستى حابارلامانى ينتەرۆيۋەرلەرگە كورسەتۋى ءتيىس. ولارعا ساۋالناما قايتا جۇرگىزىلمەيدى. ساناقشىلاردا حالىق ساناعىنىڭ لوگوتيپى بەدەرلەنگەن كوك ءتۇستى شارف پەن سومكە، پلانشەتى جانە ساناق قىزمەتكەرى ەكەنىن راستايتىن كۋالىگى بولادى. ول كۋالىكتەگى تىركەۋ ءنومىرى ارقىلى ينتەرۆيۋەر تۋرالى مالىمەتتەردى sanaq.gov.kz سايتىندا تەكسەرۋ مۇمكىندىگى بار. ودان بولەك، 1446 نومىرىنە حابارلاسۋعا بولادى. بايلانىس ورتالىعى تاۋلىك بويى جۇمىس ىستەيدى.

«حالىق ساناعى ەلىمىز ءۇشىن اسا ماڭىزدى شارا. سوندىقتان وعان ءبىر كىسىدەي بارشامىز جۇمىلىپ ات سالىسۋىمىز قاجەت. ينتەرۆيۋەرلەر دە ەل ازاماتتارى ەكەنىن ۇمىتپايىق. ەڭبەگىن باعالاپ، قۇرمەت كورسەتىپ، تۇسىنىستىك تانىتۋلارىڭىزدى سۇرايمىز»، - دەپ اتاپ ءوتتى نۇربولات ايداپكەلوۆ.

ايتا كەتەيىك، ساناقتىڭ نەگىزگى كەزەڭى اياقتالعان سوڭ، قاراشانىڭ 1-7 ارالىعىندا ساناق وتكىزۋ ادىستەمەسىنە سايكەس، باقىلاۋ ارالاۋ قاراستىرىلعان. بۇل كەزەڭدە شامامەن 10 پروتسەنت رەسپوندەنت قامتىلادى.