ماۋلەن اشىمبايەۆ ساۋد ارابياسى كونسۋلتاتيۆتىك كەڭەسىنىڭ توراعاسىمەن كەزدەستى

ءوز سوزىندە ماۋلەن اشىمبايەۆ پارلامەنت سەناتى مەن كونسۋلتاتيۆتىك كەڭەس اراسىنداعى ەكىجاقتى ءوزارا ءتيىمدى ىنتىماقتاستىقتى نىعايتۋدىڭ الەۋەتى مول ەكەنىن اتاپ ءوتتى.

سونداي-اق پالاتا سپيكەرى ساۋد ارابياسى قازاقستان ءۇشىن ماڭىزدى ساۋدا-ەكونوميكالىق سەرىكتەس ەكەنىن، ال ەكى ەل حالقىن ورتاق ءدىن مەن رۋحاني قۇندىلىقتار بايلانىستىراتىنىن ايتتى. سەنات ءتوراعاسى جان-جاقتى دامىپ كەلە جاتقان ەكىجاقتى قارىم-قاتىناس ءدال وسى قۇندىلىقتارعا تابان تىرەيتىنىنە نازار اۋداردى.

«سوڭعى جىلدارى ءبىزدىڭ ەلدەرىمىز اراسىنداعى بايلانىس ەرەكشە ەكپىنمەن دامىپ كەلەدى. بۇل - قازاقستان پرەزيدەنتى قاسىم-جومارت كەمەل ۇلى توقايەۆ پەن ساۋد ارابياسىنىڭ كورولى سالمان بەن ابدەلازيز ءال-ساۋد اراسىنداعى دوستىق قارىم-قاتىناستىڭ ناتيجەسى. ەكى ەلدىڭ بايلانىسىن ودان ءارى دامىتىپ، نىعايتۋ ماسەلەسى قازاقستاننىڭ تۇڭعىش پرەزيدەنتى - ەلباسى نۇرسۇلتان ءابىش ۇلى نازاربايەۆتىڭ ۇنەمى باستى نازارىندا. مەملەكەت باسشىلارى بەلگىلەپ بەرگەن وسىنداي جوعارى دەڭگەيدەگى ىنتىماقتاستىقتى قازاقستان پارلامەنتى مەن ساۋد ارابياسى كورولدىگى كونسۋلتاتيۆتىك كەڭەسى تاراپىنان لايىقتى جالعاستىرۋ ماڭىزدى»، - دەدى ماۋلەن اشىمبايەۆ.

سۇحباتتاسۋ بارىسىندا تاراپتار ەكى مەملەكەتتىڭ وكىلدى ورگاندارى اراسىنداعى ىنتىماقتاستىقتى نىعايتۋعا مۇددەلى ەكەندەرىن تانىتتى.

«بۇل رەتتە قازاقستان پرالمەنتى مەن كورولدىكتىڭ كونسۋلتاتيۆتىك كەڭەسىندە قۇرىلعان ەلدەرىمىز اراسىنداعى دوستىق توپتارىنىڭ ماڭىزى زور. ءبىز ساۋد ارابياسىنىڭ ەكونوميكانى ءارتاراپتاندىرۋ جانە جاڭعىرتۋ باعدارلاماسىن زەردەلەۋگە مۇددەلىمىز»، - دەدى ماۋلەن اشىمبايەۆ.

سونىمەن قاتار كەزدەسۋ كەزىندە كەلەسى جىلى 14-15- قىركۇيەك كۇندەرى نۇر- سۇلتان قالاسىندا وتەتىن الەمدىك جانە ءداستۇرلى دىندەر ليدەرلەرىنىڭ VII سەزىنە دايىندىق بارىسى دا كەڭىنەن ءسوز بولدى. سەنات سپيكەرى ساۋد ارابياسىنىڭ قازاقستاندا وتەتىن ءداستۇرلى ءدىنارالىق فورۋمدى ۇنەمى قولداپ كەلە جاتقانىن تىلگە تيەك ەتتى. وسىعان وراي سۇحباتتاسۋشىلار سەزد اياسىندا دا ەكى ەلدىڭ ىنتىماقتاستىعىن ارتتىرۋعا نيەتتى ەكەندەرىن ءبىلدىردى.

«سەزگە ءدىن ليدەرلەرىمەن قاتار بەلگىلى ساياسي قايراتكەرلەر مەن حالىقارالىق ۇيىمداردىڭ باسشىلارى دا قاتىسادى. كورولدىك وكىلدەرى جۇمىس توپتارى مەن سەزد حاتشىلىعىنىڭ وتىرىستارىنا تۇراقتى تۇردە قاتىسىپ، فورۋمنىڭ مازمۇندى وتۋىنە جانە قورىتىندى قۇجاتتى دايىنداۋعا ۇلكەن ۇلەس قوسىپ كەلەدى. وسىعان وراي ساۋديالىق تاراپقا فورۋم جۇمىسىنا بەلسەندى قاتىسىپ كەلە جاتقانى ءۇشىن العىسىمىزدى بىلدىرەمىز. كەلەسى جىلى وتەتىن VII سەزد بارىسىندا دا قولداۋ كورسەتەسىزدەر دەپ ۇمىتتەنەمىز»، - دەدى ماۋلەن اشىمبايەۆ.

كەزدەسۋدە كوروناۆيرۋس پاندەمياسىمەن كۇرەس ماسەلەسى دە نازاردان تىس قالمادى. سەنات سپيكەرى قازاقستاننىڭ وسى باعىتتا قابىلداعان شارالارىنا، ونىڭ ىشىندە QazVac وتاندىق ۆاكسينا ازىرلەۋ ىسىنە توقتالىپ ءوتتى. سونداي-اق ول قازاقستاننىڭ QazVac-تى وزگە ەلدەرگە ەكسپورتتاۋعا دايىن ەكەنىن دە جەتكىزدى.

سەنات باسپا ءسوز قىزمەتىنىڭ مالىمەتىنشە، پالاتا ءتوراعاسى ەلىمىزدىڭ وڭىردە جانە الەمدە بيولوگيالىق قاۋىپسىزدىكتى قامتاماسىز ەتۋگە باسا ءمان بەرىپ وتىرعانىن ايتتى. پاندەميا بۇگىندە بۇل ماسەلەنىڭ قانشالىقتى وزەكتى ەكەنىن كورسەتىپ بەردى. م. اشىمبايەۆ قازاقستان پرەزيدەنتىنىڭ ب ۇ ۇ- نىڭ قولداۋىمەن حالىقارالىق بيولوگيالىق قاۋىپسىزدىك جونىندەگى اگەنتتىك قۇرۋ تۋرالى باستاماسىنىڭ ماڭىزى زور ەكەنىنە كوڭىل ءبولدى.

بۇدان باسقا ەكى ەل اراسىندا تۋريزم سالاسى بويىنشا دا ىنتىماقتاستىقتى كۇشەيتۋگە زور مۇمكىندىكتەر بار ەكەنى ايتىلدى. سەنات ءتوراعاسى ەلىمىزدىڭ تۋريستىك الەۋەتىنە كەڭىرەك توقتالىپ، تۇركىستان قالاسىندا جانە كاسپي جاعالاۋىندا سالىنىپ جاتقان سالالىق كلاستەرلەرگە، سونداي-اق، وسى باعىتتاعى باسقا دا باستامالارعا نازار اۋداردى.

كەزدەسۋ سوڭىندا تاراپتار الداعى ۋاقىتتا قازاقستان- ساۋديا قارىم-قاتىناسىن ودان ءارى نىعايتۋعا جانە كەڭەيتۋگە بەلسەندى تۇردە ىقپال ەتۋگە، سول جولدا ىنتىماقتاسۋعا دايىن ەكەندەرىن جەتكىزدى.