اڭساعان ءسابي: ءبىر ادام نەشە رەت تەگىن ەكوۇرىقتاندىرۋ جاساتا الادى

None
None
نۇر- سۇلتان. قازاقپارات - نۇر- سۇلتان قالاسىنداعى №2 كوپ بەيىندى قالالىق اۋرۋحاناسى وتباسىن جوسپارلاۋ ورتالىعىنىڭ گينەكولوگ- ەندوكرينولوگى ايگۇل مۇسابايەۆا بالا سۇيگىسى كەلگەن جۇپتار مەن انالار «اڭساعان ءسابي» باعدارلاماسى ارقىلى نەشە رەت ەكستراكورپورالدى ۇرىقتاندىرۋعا قاتىسا الاتىنىن ايتتى، دەپ حابارلايدى قازاقپارات ءتىلشىسى.

«ەكستراكورپورالدى ۇرىقتاندىرۋدى جىلىنا ءبىر رەت جاساۋعا بولادى. الدىڭعى «ەكو» ناتيجەسىز وتسە، كەلەسى جىلى دايىندالىپ، قايتادان تەگىن جاساتا الادى. ياعني، الدىڭعى «ەكو» ناتيجەسىز بولعاندىقتان، مەملەكەت تاراپىنان قايتا تەگىن كومەك الۋعا قۇقىلى»، - دەدى مامان ورتالىق كوممۋنيكاتسيالار قىزمەتىندە وتكەن بريفينگىدە.

سونداي- اق، ول «اڭساعان ءسابي» باعدارلاماسى بويىنشا قانداي جۇپتار ءجيى جۇگىنىپ جاتقانىن ايتتى. «بەدەۋلىكتىڭ ەكى ءتۇرى بار. ءبىرى تۋا پايدا بولسا، ەكىنشىسى جۇرە پايدا بولادى. بىزگە سولاردىڭ ىشىندە كوبىنە جۇرە پايدا بولعان اقاۋلاردىڭ، جۇرە پايدا بولعان سوزىلمالى اۋرۋلاردىڭ سالدارىنان بەدەۋلىككە شالدىققان ادامدار ءجيى كەلىپ جاتىر»، - دەدى ايگۇل مۇسابايەۆا.

گينەكولوگ- ەندوكرينولوگى ايگۇل مۇسابايەۆا ەكستراكورپورالدى ۇرىقتاندىرۋعا قارسى مەديتسينالىق كورسەتىلىمدەردى اتادى.

«جاتىر قوسىلىمىنا ەمبريوندى يمپلانتاتسياعا كەدەرگى كەلتىرەتىن تۋا بىتكەن، جۇرە بىتكەن اقاۋلار، جۇكتىلىك قارساڭىندا قارسى كورسەتىلىمى بار پسيحولوگيالىق، سوماتيكالىق وزگەرىستەر، وپەراتسيامەن ەمدەۋدى قاجەت ەتەتىن انالىق بەزدەر، جاتىردىڭ قاتەرسىز ىسىكتەرى، ونكولوگيا، جەدەل قابىنۋ، كەز كەلگەن لوكاليزاتسيا ونكولوگياسى، ەسىرتكى مەن الكوگولگە تاۋەلدىلىك، جاتىر قوسالقىلارىنىڭ گيدروسالپينگسى، ساكتوسالپينكس، جاتىردىڭ سينەحياسىز ىسىكتەرى جاتىردان تىس ۇرىقتاندىرۋعا كەدەرگى جاساپ، ناتيجەسىن تومەندەتەتىن جانە بولدىرمايتىن قارسى كورسەتىلىم بولىپ سانالادى»، - دەدى مامان.

اتالمىش شارادا انا مەن بالا دەنساۋلىعىن قورعاۋ دەپارتامەنتىنىڭ ديرەكتورى ماعريپا ەمبەرگەنوۆا «اڭساعان ءسابي» باعدارلاماسىنىڭ اياسىندا بيىل 40 نارەستە دۇنيەگە كەلگەنىن ءمالىم ەتتى.

«10- قاراشاداعى جاعداي بويىنشا، «اڭساعان ءسابي» باعدارلاماسى بويىنشا 6 مىڭ ەمدەلۋشىگە «ەكو» جاسالدى. بۇل بۇكىل جوسپارلى كولەمنىڭ 84 پايىزى دەگەن ءسوز. تاعى 740 پاتسيەنت وسى باعدارلاماعا قاتىسىپ باستادى. 2000 نان استام جۇكتى ايەل ەسەپكە الىندى»، - دەدى دەپارتامەنت ديرەكتورى.

اۆتور: ەسىمجان ناقتىباي


سوڭعى جاڭالىقتار