شاۋەشەك قالاسىنداعى جۇرتتى قىزىقتىرعان «سىرناي مۇراجايى» - شەتەلدەگى قازاق ءتىلدى ب ا ق- قا شولۋ

شاۋەشەك قالاسىنداعى جۇرتتى قىزىقتىرعان «سىرناي مۇراجايى» - CNR

قىتايداعى شاۋەشەك قالاسى شىعىس پەن باتىس مادەنيەتىنىڭ ۇيلەسىمى توعىسقان ورتالىق سانالادى. وسى «گارمون مەكەنى» اتالعان شاۋەشەك قالاسىنداعى «سىرناي مۇراجايىندا» اسپاپتىڭ ءتۇر- ءتۇرى ساقتالعان، دەپ جازادى قىتايلىق kazakcnr.com سايتى .

«ىلە قازاق اۆتونوميالى وبلىسىنا قارايتىن، شىعىس پەن باتىس مادەنيەتىنىڭ توعىسقان ورتالىعى سانالاتىن شاۋەشەك قالاسىندا قىتاي، قازاق، ۇيعىر، دوڭعان، داعۇر، ورىس سەكىلدى ۇلتتاردان قۇرالعان 146 مىڭ حالىق تۇرادى. سوندىقتان بولسا كەرەك «گارمون مەكەنى» اتالعان شاۋەشەك قالاسىندا ءار ۇلتتىڭ ءان- كۇيى اۋەلەپ، مادەني ورتاسى ءبىر- بىرىمەن توعىسىپ، ۇندەسىپ جاتادى. ال بۇل قالانىڭ تۇرعىندارىنىڭ گارمون اسپابىنا دەگەن قۇرمەتى مەن ىقىلاسى ايىرىقشا. ءار شاڭىراقتىڭ تورىندە گارمون اسپابىنىڭ ءىلىنىپ تۇرۋى قالىپتى قۇبىلىس. كوپشىلىك باس قوسقان توي- مەرەكەدە نەمەسە ۇيگە قوناق كەلگەندە بولسىن گارموننىڭ سازدى ءۇنىن ەستيسىز. سونىمەن بىرگە «گارمون مەكەنى» اتالاتىن قالاداعى سىرناي مۇراجايىنىڭدا اتاعى الىسقا جەتىپ، بۇل اسپاپتىڭ وسى مەكەن ءۇشىن قانشالىقتى ماڭىزدى بولعانىن ايگىلەي تۇسەدى. اتالعان مۇراجايدا ءارتۇرلى مەملەكەتتەردە جاسالعان، ۇقساماعان ۇلگىدەگى 900 دەن استام گارمون اسپابى ساقتالعان. تىپتەن بازاردان تابىلا بەرمەيتىن اسپاپتىڭ كونە نۇسقالارى دا كەزدەسەدى. بۇل قىتايداعى قازىرگى كۇنگى ەڭ ۇلكەن «سىرناي مۇراجايى» سانالادى. سوندىقتان قالاعا سىرتتان كەلەتىن قوناقتار وسى مادەني ورتالىققا كەلۋگە اسىعادى»، - دەپ جازادى CNR سايتى.

ەسكە سالا كەتەيىك، گارموندى 1822 -جىلى نەمىس شەبەرى ف. بۋشمان ويلاپ تاپقان. بۇل اسپاپ شىققان بويدا ونەرسۇيەر قاۋىم اراسىندا كەڭىنەن تارالىپ، تىپتەن، وزگە تۇرلەرى دە پايدا بولا باستادى. ونىڭ قولمەن، اياقپەن جانە اۋىزبەن تارتىلاتىن تۇرلەرى بار ەكەنى بەلگىلى.

قازاق حالقى وعان ۇلتىمىزدىڭ ەجەلگى ۇرمەلى مۋزىكالىق اسپابىمەن دىبىستىق ۇقساستىعىنا بايلانىستى «سىرناي» دەگەن اتاۋ بەرگەن.

بۇدان باسقا ونىڭ ءۇن شىعارۋى مەن اككومپانەمەنتتىك توننىڭ كوپتىگىنە بايلانىستى اككوردەون، بايان، گارمون دەگەن اتاۋلارى دا بار. رەسەيدە سىرناي XIX عاسىردىڭ باسىندا پايدا بولسا، قازاقستاندا ول سول عاسىردىڭ ەكىنشى جارتىسىندا تارادى. قازاقتىڭ حالىق انشىلەرى مايرا، نارتاي، شاشۋباي، قۇتباي، ت. ب. گارمونمەن ءان سالعان.

رەسەيدەن موڭعوليا ارقىلى قىتايعا گاز قۇبىرى تارتىلادى - KAZNEWS

رەسەيدەن موڭعوليا ارقىلى قىتايعا 960,5 شاقىرىم گاز قۇبىرى تارتىلادى، دەپ حابارلايدى موڭعوليانىڭ Kaznews اقپاراتتىق پورتالى.

«موڭعوليا پرەمەر- ءمينيسترىنىڭ ورىنباسارى س. امارسايحان ۇكىمەتىنىڭ بۇگىنگى وتىرىسىندا گاز قۇبىرى جوباسىن تانىستىردى. جوبا بويىنشا حياگت- سۇحبااتار- زامىن ءۇۇد- ەرەەنگە دەيىن قۇبىر تارتىلادى. ۇزىندىعى - 960,5 شاقىرىم. جوبا بويىنشا گاز قۇبىرىنىڭ قۇرىلىس جۇمىستارى 2024 -جىلى باستالادى. ەكى ەلدىڭ بىرلەسكەن جۇمىس توبى بۇل جوبانىڭ تەحنيكالىق- ەكونوميكالىق نەگىزدەمەسى دايىندالىپ جاتقانىن ايتتى»، - دەپ جازدى Kaznews.

تەھراندا «اتاجۇرتىم - قازاقستان» اتتى كورمە ءوتىپ جاتىر - فارس

يران استاناسى تەھراننىڭ Zarna گالەرەياسىندا قازاقستان رەسپۋبليكاسى تاۋەلسىزدىگىنىڭ 30 جىلدىعىنا ارنالعان «اتاجۇرتىم - قازاقستان» اتتى كورمە ءوتىپ جاتىر، دەپ حابارلايدى يراننىڭ Parstoday اقپارات اگەنتتىگى.

«كورمەدە ۇلتتىق كيىمدەر، قولونەر بۇيىمدارى، تۇسكيىزدەر مەن كىلەمشەلەر، كارتينالار مەن كىتاپتار قويىلعان. كورمەگە يراننىڭ مەديا وكىلدەرى جانە ونەرپازدارىمەن قوسا، قازاقستاننىڭ يرانداعى ەلشىلىگىنىڭ كەڭەسشىسى دۇيسەباي داۋىربەك قاتىستى. كورمە 6 كۇنگە سوزىلادى. ۇيىمداستىرۋشى - يير تەلەراديو بىرلەستىگى الەمدىك قىزمەت تورابىنا قاراستى قازاق راديوسىنىڭ اۋدارماشىسى ومارحانوۆا گاۋحار جۇماعازى قىزى»، - دەپ جازادى Parstoday اقپارات اگەنتتىگى.

سامارقاند وزبەكستانداعى تاريحي - مادەني ەسكەرتكىشتەرى ەڭ كوپ ايماق - « ءو ز ا» اقپاراتتىق اگەنتتىگى

وزبەكستاندا 2264 تاريحي - مادەني ساۋلەت ەسكەرتكىشتەرى بار. سامارقاند ەلدەگى مادەني ەسكەرتكىشتەرى ەڭ كوپ ايماق بولىپ تابىلادى، دەپ جازادى وزبەكستاننىڭ « ءو ز ا» مەملەكەتتىك اقپاراتتىق اگەنتتىگى.

«مەملەكەتتىك ستاتيستيكا كوميتەتىنىڭ حابارلاۋىنشا، 2021 -جىلدىڭ 1-قاڭتارىنداعى جاعداي بويىنشا وزبەكستانداعى ساۋلەت ەسكەرتكىشتەرىنىڭ سانى 2264 ءتى قۇراعان. وسى دەرەككە ساي، رەسپۋبليكانىڭ ءار ءبىر ايماعىندا قانشا ساۋلەت ەسكەرتكىشتەرى بار ەكەنى تۋرالى مالىمەت جاريالاندى. وندا سامارقاند وبلىسىندا 562، بۇحارا وبلىسىندا 507، تاشكەنت قالاسىندا 288، قاشقاداريا وبلىسىندا 208، فەرعانا وبلىسىندا 139 ساۋلەت ەسكەرتكىشتەرى بار.. .» ، - دەپ جازادى «ءو ز ا» اقپاراتتىق اگەنتتىگى.

2022 -جىلى بايان- ولگەيگە بيۋدجەتتەن 56,9 ميلليارد توگروگ قارجى ءبولىندى - KAZNEWS

موڭعوليا پارلامەنتىنىڭ كەزەكتى سەسسياسىندا ەلدىڭ 2022 -جىلعا ارنالعان بيۋدجەتى، الەۋمەتتىك ساقتاندىرۋ قورى مەن مەديتسينالىق ساقتاندىرۋ قورى، بولاشاق مۇرا قورىنىڭ 2022 -جىلعا ارنالعان بيۋدجەتى تۋرالى زاڭ جوباسى تالقىلانىپ، بەكىتىلدى، دەپ حابارلايدى موڭعوليانىڭ Kaznews اقپاراتتىق پورتالى.

«موڭعوليا پارلامەنتىنىڭ دەپۋتاتى اۋباكىر تىلەۋحان ۇلىنىڭ باسپا ءسوز قىزمەتى حابارلاعانداي، 2022 -جىلى بايان- ولگەي ايماعىنا مەملەكەتتىك بيۋدجەتتەن 56,9 ميلليارد توگروگ قارجى بولىنگەن. بۇل قارجى مەكتەپ، جاتاقحانا، سپورت زال، بالاباقشا، مادەنيەت ورتالىقتارىن جانە وزگە نىسانداردى سالۋعا، تەحنيكالىق قۇرال جابدىقتار الۋعا جۇمسالادى»، - دەپ جازدى Kaznews.

قازاقستاندا اتاتۇرىكتى ەسكە الدى - TRT

تۇركيا رەسپۋبليكاسىنىڭ نەگىزىن قالاۋشى عازي مۇستافا كەمال اتاتۇرىك دۇنيەدەن وتكەنىنە 83 جىل تولۋىنا وراي قازاقستاننىڭ استاناسى نۇر- سۇلتاندا سالتاناتتى شارامەن ەسكە الىندى، دەپ حابارلايدى تۇركيا راديو تەليەۆيزيا پورتالى.

«ەسكە الۋ شاراسى نۇر- سۇلتانداعى اتاتۇرىك ساياباعىنداعى اتاتۇرىك ەسكەرتكىشى الدىندا ءوتتى.

تۇركيانىڭ قازاقستانداعى وكىلەتتى ەلشىسى ۋفۋك ەكيدجي: «بۇل ەسكە الۋ ءراسىمىن اتامەكەنىمىز نۇر- سۇلتاندا، ەلىمىزدەن الىس گەوگرافيادا وتكىزۋ - ءبىز ءۇشىن قۇرمەت جانە ماقتانىش. بۇل كۇن ءبىز ءۇشىن تەك ەسكە الۋ كۇنى رەتىندە عانا ەمەس، عازي مۇستافا كەمال اتاتۇرىك امانات ەتىپ قالدىرعان رەسپۋبليكانى، رەسپۋبليكانىڭ قۇندىلىقتارىن، مۇراتتارىن جانە جاۋاپكەرشىلىكتەرىن ەسكە الۋ ماعىناسىندا دا ماقتانىش قاينارى» دەدى. تۇركيانىڭ قازاقستانداعى ەلشىلىگى ۇيىمداستىرعان سالتاناتتى شاراعا قازاقستانداعى تۇرىك مەكەمەلەرىنىڭ وكىلدەرى مەن نۇر- سۇلتاندا تۇراتىن تۇرىك ازاماتتارى قاتىستى. سالتاناتتى شارا اتاتۇرىك ەسكەرتكىشىنە گۇل شوقتارىن قويۋمەن اياقتالدى»، - دەپ جازادى TRT.

اۆتور: باقىتجول كاكەش