قىتايداعى قازاق رەجيسسەرى تۇسىرگەن فيلم كورەرمەندەردى تاڭعالدىردى - شەتەلدەگى قازاق ءتىلدى ب ا ق-قا شولۋ

Kaznews اقپارات اگەنتتىگىنىڭ 10 جىلدىق مەرەي تويى تويلاندى - Kaznews

25-قاراشا كۇنى موڭعوليالىق «Kaznews» اقپاراتتىق اگەنتتىگىنىڭ 10 جىلدىق مەرەي تويى ءوتتى، دەپ حابارلايدى «Kaznews».

سالتاناتتى ءراسىمدى اتالعان اقپاراتتىق اگەنتتىكتىڭ نەگىزىن قالاۋشى ومىربەك قاباي ۇلى اشتى. «Kaznews» اقپارات اگەنتتىگىنىڭ قۇرىلعانىنا بيىل 10 جىل تولىپ وتىر. 2011 -جىلى 11-قاراشادا قۇرىلىپ، 2018 -جىلى موڭعوليانىڭ بايلانىستى رەتتەۋ كوميتەتىنەن اقپاراتتىق قۇرال مارتەبەسىن العان. وزدەرىڭىزگە بەلگىلى بولعانداي 2020 -جىلى «قازاقپارات» حالىقارالىق اقپارات اگەنتتىگىنىڭ 100 جىلدىعىنا وراي «ۇركەر» ۇلتتىق سىيلىعىمەن ماراپاتتالدىق. 2021 -جىلعا دەيىن اگەنتتىكتىڭ سايتى 5 رەت جاڭارىپ، زاماناۋي، جاڭا تەحنولوگيالىق تالاپتارعا ساي قىزمەت كورسەتۋدە. بۇگىنگە دەيىن 3500-گە جۋىق ماتەريال جاريالانىپ، ينتەرنەتتە قازاق ءتىلدى كونتەنتتەردىڭ سانىن ارتتىرۋعا، موڭعوليا مەن بايان- ولگيي ايماعىن دارىپتەۋ جولىندا سۇبەلى ەڭبەك اتقارىپ كەلەدى...» ، دەدى ومىربەك قاباي ۇلى.

موڭعوليادا العاش رەت «Kaznews» اگەنتتىگىنىڭ 10 جىلدىعىنا وراي «HIT NEWS 2021» سىيلىعىن تابىستاۋ ءراسىمىن وتكىزدى.

اتالعان سىيلىق يەگەرلەرىن ماراپاتتاۋ ءۇشىن Kaznews اگەنتتىگىندە 2021 -جىلى جاريالانعان ماقالا، جاڭالىق، سۇحباتتاردان ەڭ كوپ تالقىلانىپ، ەڭ كوپ وقىلعان ۇزدىكتەرى بەلگىلەنگەن. سىيلىقتى داۋىس بەرۋ ارقىلى ەمەس، سايتتاعى ساندىق جۇيەگە نەگىزدەلگەن ستاتيستيكالىق مالىمەتتەرگە جۇگىنە وتىرىپ انىقتاعانىن تىلگە تيەك ەتتى ءو. قاباي ۇلى.

ايتا كەتەيىك، سالتاناتتى ءىس-شارادا موڭعوليا پارلامەنتىنىڭ دەپۋتاتى اۋباكىر تىلەۋحان ۇلىنىڭ، قازاقستان رەسپۋبليكاسىنىڭ موڭعولياداعى ەلشىسى جالعاس ادىلبايەۆ مىرزانىڭ، وتانداستار قورىنىڭ ۆيتسە-پرەزيدەنتى ماعاۋيا سارباسوۆ مىرزانىڭ قۇتتىقتاۋى وقىلدى.

بايان-ولگي ايماعىنىڭ اكىمى باۋىرجان دالەل ۇلى Kaznews اقپارات اگەنتتىگىنىڭ 10 جىلدىق مەرەي تويىمەن قۇتتىقتاۋ ءسوزىن سويلەپ، ومىربەك قاباي ۇلىن «بايان-ولگي ايماعىنىڭ وزات قىزمەتكەرى» توسبەلگىسىمەن ماراپاتتاعان.

قازاقستان وزبەكستاننىڭ يمپورتتاعى ۇلەسى ەڭ جوعارى ەلدەر قاتارىندا - «ءوزا»

وزبەكستاننىڭ قاي ەلدەردەن كوبىرەك يمپورت جاسايتىنى بەلگىلى بولدى. مەملەكەتتىك ستاتيستيكا كوميتەتىنىڭ مالىمەتىنشە، 2021 -جىلدىڭ قاڭتار- قازان ايلارىندا وزبەكستاننىڭ يمپورتتاعى ۇلەسى ەڭ جوعارى ەلدەر قاتارىندا رەسەي، قىتاي، قازاقستان كوش باستاپ تۇر، دەپ حابارلادى «ءوزا» مەملەكەتتىك اقپارات اگەنتتىگى.

وسى ۋاقىت ارالىعىندا 4,2 ميلليارد دوللارلىق تاۋار رەسەيدەن كەلگەن بولسا، 4 ميلليارد دوللارلىق ءونىم قىتايدان، 2,2 ميلليارد دوللارلىق تاۋار كورشى قازاقستان ەلىنەن اكەلىنگەن. وزبەكستاندىق ب ا ق- تىڭ دەرەگىنشە، وسى ءۇش ەلدەن باسقا كورەيا، تۇركيا، گەرمانيا، تۇركىمەنستان، ءۇندىستان، ۋكراينا، ليتۆا قاتارلى ەلدەردەن يمپورتتىق تاۋارلار اكەلىنەدى ەكەن. وزبەكستاننىڭ ەكسپورتى بويىنشا ەلىمىز العاشقى تورتتىكتە تۇر.

«2021 -جىلدىڭ قاڭتار- قازان ايلارىندا وزبەكستان ەكسپورتىنىڭ كولەمى 12,4 ميلليارد ا ق ش دوللارىن قۇرادى. ەكسپورت بويىنشا ەڭ جوعارى ۇلەسكە يە ەلدەر قاتارى مىناداي: قىتاي - 2,1 ميلليارد دوللار، رەسەي - 1,7 ميلليارد، تۇركيا - 1,4 ميلليارد، قازاقستان - 952,4 ميلليون، قىرعىزستان - 643,4 ميلليون، اۋعانستان - 521,6 ميلليون، تاجىكستان - 394,8 ميلليون، ۋكراينا - 172,4 ميلليون، كانادا - 171,5 ميلليون، تۇركىمەنستان - 151,5 ميلليون دوللار»، دەپ جازدى «ءوزا» اقپارات اگەنتتىگى.

وزبەكستاننىڭ سىرتقى ساۋدا اينالىمى 32,6 ميلليارد دوللاردى قۇراعان.

بەك تۇسىرگەن فيلم قىتاي كورەرمەندەرىن تامساندىردى - CNR باسىلىمى

«قۇلىپ» («门锁») اتتى بۇل فيلم ءبىر وتباسىندا جالعىز ءوزى تۇراتىن ايەلدەر ءومىرىنىڭ قاۋىپسىزدىگى تۋرالى تاقىرىپقا تۇسىرىلگەن. فيلم 6 كۇن بۇرىن پروكاتقا شىقتى جانە قازىرگە دەيىن ساتىلعان بيلەتتەردەن تۇسكەن اقشا 148 ميلليون يۋانعا(9916000000 تەڭگە - اۆت. ) جەتتى. بۇل كينونىڭ رەجيسسەرى بەك (وركەنبەك بەيسەنباي ۇلى) ەسىمدى شىڭجاڭدىق قازاق ازامات، دەپ حابارلايدى قىتايدىڭ CNR باسىلىمى.

اتالعان فيلم كورەرمەندەردىڭ ىستىق ىقىلاسىنا بولەندى. سونىمەن بىرگە، كينونىڭ كوتەرگەن تاقىرىبى بۇگىنگى قوعام ءۇشىن وتە وزەكتى ءارى ارتىستەردىڭ ويناۋ شەبەرلىگى دە جوعارى دەڭگەيدە دەپ باعالانۋدا.

«مەن رەجيسسەرلىك ەتكەن بۇل فيلم پروكاتقا شىققان تۇڭعىش تولىقمەتراجدى تۋىندى. وسى كينوعا بارلىق كۇش- جىگەرىمدى جۇمسادىم. ءتۇسىرىلىم بارىسىندا جاس رەجيسسەرلەر باستان وتكىزەتىن قيىنشىلىقتاردى باستان وتكەردىم»، - دەدى بەيجىڭدە تۇراتىن جاس رەجيسسەر بەك.

قىتايلىق ب ا ق-تىڭ كەلتىرگەن دەرەكتەرىنە سۇيەنسەك، بۇل فيلم ءبىر ۇيدە جالعىز ءوزى تۇراتىن ايەلدەردىڭ شىنايى ءومىرىن كورسەتەتىن العاشقى فيلمدەردىڭ ءبىرى. بۇقارالىق اقپارات قۇرالدارىنىڭ ستاتيستيكاسى بويىنشا، 2021 -جىلى قىتايدا وتباسىندا جالعىز تۇراتىن ايەلدەردىڭ سانى 100 ميلليونعا جاقىنداعان. بۇل وتە ۇلكەن پروبلەمالاردىڭ بەتىن اشادى.

«بەكتىڭ ءفيلمى جالعىز تۇراتىن ايەلدەردىڭ كۇرمەۋلى ماسەلەلەرىن ەسكەرتەتىن جاي عانا الەۋمەتتىك فيلم ەمەس. وندا تريللەر رەتىندە فيلمدە قورقىنىشتى ەپيزودتار دا قامتىلعان. بۇل ارقىلى رەجيسسەر فيلمنىڭ نەگىزگى ايتايىن دەگەن ويىن ناقتىلاۋعا تىرىسادى»، دەپ جازادى CNR.

«باسىندا قانداي فيلم تۇسىرسەڭىز ول جاس مامان ءۇشىن تاجىريبە جيناۋ كەزەڭى بولادى. «قۇلىپ» تۋىندىسى مەنىڭ جانرلىق فيلم تۇسىرۋدەگى العاشقى تاجىريبەم. بۇل بويىنشا سىن دا، ءمىن دە ايتىلسا مەن سول ارقىلى بولاشاقتاعى شىعارماشىلىق بەتالىسىمدى ايقىندايمىن»، دەيدى جاس رەجيسسەر وركەنبەك بەيسەنباي ۇلى تىلشىلەرگە بەرگەن سۇحباتىندا.

ايتا كەتەيىك، بەيجىڭ قالاسىندا تۇراتىن قانداسىمىز، جاس رەجيسسەر وركەنبەك بەيسەنباي ۇلى قىتاي ەلىندە كينو سالاسى بويىنشا جەمىستى ەڭبەك ەتىپ، تالانتىمەن جۇرتقا تانىلىپ ءجۇر. بەيجىڭ كينەماتوگرافيا اكادەمياسىنىڭ تۇلەگى، تالانتتى جاس رەجيسسەر وركەنبەك بەيسەنباي ۇلى 1993 -جىلى قىتايدىڭ شىڭجاڭ ولكەسى، سانجى وبلىسىنىڭ ماناس اۋدانىندا دۇنيەگە كەلگەن. ول بۇعان دەيىن قىتايدا كوپ سەريالى تەلەفيلم ءتۇسىرۋدىڭ ەڭ ۇزدىك مامانى دەپ مويىندالعان ۋباي دەگەن رەجيسسەر ەكەۋى بيۋدجەتى 460 ميلليون يۋان (65 ميلليون 800 مىڭ دوللار) بولعان، 60 ءبولىمدى «نىساناعا الۋ» اتتى تەلەسەريالىن تۇسىرگەن. رەجيسسەر رەتىندەگى وركەنبەكتىڭ تىرناقالدى تۋىندىسى «قۇتقارۋ» اتتى قىسقامەتراجدى كينوفيلمى. ونىڭ وسى شىعارماسى 2017 -جىلدىڭ جەلتوقسان ايىندا وتكەن 8-شى قىتاي حالىقارالىق «جاڭا مەديا» قىسقامەتراجدى فيلمدەر فەستيۆالىندە جۇلدەلى ورىنعا يە بولعان. «قۇتقارۋ» فيلمى 2018 -جىلى حالىقارالىق كانن كينوفەستيۆالىندە ۇزدىك ميكروفيلمنىڭ ءبىرى اتاندى.

سەرىك بەردىمۇرات ۇلىنىڭ قارسىلاستارىن ۇتقان ءساتى - Kaznews

موڭعوليانىڭ ۇلان-باتىر قالاسىندا SPS تەلەارناسىنىڭ باستاماسىمەن ۇيىمداستىرىلعان «باحدام گارامگاي ۋران حۋرتس» پالۋاندار باسەكەسىندە بايان-ولگي ايماعىنىڭ تۋماسى مەملەكەتتىك لاشىن دارەجەلى پالۋان سەرىك بەردىمۇرات ۇلى جەڭىمپاز اتاندى، دەپ حابارلايدى Kaznews اقپاراتتىق پورتالى.

اتالعان ب ا ق- تىڭ دەرەگىنشە، سەرىك جەڭىستىڭ بيىك تۇعىرىنا كوتەرىلۋ ءۇشىن 7 قارسىلاسىنان باسىم تۇسكەن. Kaznews اقپاراتتىق پورتالى س. بەردىمۇرات ۇلىنىڭ سول جەڭىستى ساتتەرىنەن ۆيدەو توپتاما ۇسىنعان.

تۇرىك پ ا مەن قازاقستان اراسىندا مەموراندۋم - TRT

تۇركىتىلدەس مەملەكەتتەردىڭ پارلامەنتتىك اسسامبلەياسىنىڭ باس حاتشىسى مەحمەت سۇرەيا ەر قازاقستانعا باردى. تۇركىتىلدەس مەملەكەتتەردىڭ پارلامەنتتىك اسسامبلەياسى مەن قازاقستاننىڭ تۇڭعىش پرەزيدەنتى كىتاپحاناسى اراسىندا ءوزارا سەرىكتەستىك تۋرالى مەموراندۋمعا قول قويىلدى، دەپ حابارلايدى تۇركيا راديو تەلەۆيزيا پورتالى.

اتالعان ب ا ق-تىڭ دەرەگىنشە، ءوزارا سەرىكتەستىك تۋرالى مەموراندۋم اياسىندا ەكى مەكەمە اراسىندا مادەنيەت، قۇقىق، تاريح جانە ءتىل سالالارىندا بىرلەسكەن زەرتتەۋلەر جۇرگىزىلەدى.

باس حاتشىسى مەحمەت سۇرەيا ەردىڭ ساپارى اياسىندا تۇرىك پ ا مەن قازاقستاننىڭ تۇڭعىش پرەزيدەنتى كىتاپحاناسى اراسىندا ءوزارا سەرىكتەستىك تۋرالى مەموراندۋمعا قول قويىلدى.

قول قويىلعان مەموراندۋم تۇرىك پ ا- عا مۇشە مەملەكەتتەر اراسىنداعى ءوزارا ءىس-قيمىلدى جاقسارتۋعا باعىتتالعانى ايتىلدى. باس حاتشى مەموراندۋم اياسىندا تۇرىك الەمىنىڭ بىرلىگى مەن تىنىشتىعىنا ۇلەس قوساتىن جۇمىستار اتقارۋعا كۇش سالاتىنىن ايتقان.

ونىڭ ايتۋىنشا، تۇركىتىلدەس مەملەكەتتەر پارلامەنتتىك اسسامبلەياسى پارلامەنتتىك ولشەمدەگى باسقا بەس باۋىرلاس ۇيىم اراسىنداعى ىنتىماقتاستىقتى قولداۋ جانە تورەلىك ەتۋ بولىپ تابىلادى.

فيلوسوفتىڭ مىندەتى - قوعام دەرتىن ەمدەۋ - Parstoday

الماتىدا «ءال-فارابيدىڭ «ءال- حۋرۋف» (ارىپتەر) اتتى تراكتاتىنىڭ پارسى تىلىندەگى اۋدارماسى مەن وعان جازىلعان عىلىمي تۇسىنىكتەمە» دەگەن تاقىرىپتا ۆەبينار ءوتتى، دەپ حابارلايدى يراندىق Parstoday اقپارات اگەنتتىگى.

يراندىق ب ا ق- تىڭ دەرەگىنشە، ءال- فارابي اتىنداعى قازاق ۇلتتىق ۋنيۆەرسيتەتى شىعىس تانۋ فاكۋلتەتى تاياۋ شىعىس جانە وڭتۇستىك ازيا كافەدراسى مەن اللامە تاباتاباي ۋنيۆەرسيتەتىنىڭ فيلوسوفيا عىلىمىنىڭ دوكتورى، فارابيتانۋشى قاسىم پۋرحاسان ءدارزيدىڭ قاتىسۋىمەن 17 قاراشا كۇنى «ءال-فارابيدىڭ «ءال-حۋرۋف» (ارىپتەر) اتتى تراكتاتىنىڭ پارسى تىلىندەگى اۋدارماسى مەن وعان جازىلعان عىلىمي تۇسىنىكتەمە» دەگەن تاقىرىپتا ۆەبينار وتكىزگەن. ۆەبيناردىڭ قوناعى قاسىم پۋرحاسان ءال- فارابي ەڭبەكتەرىنە ارنالعان ءتورت تومدىق كىتاپ جازعانىن، سونىڭ سوڭعىسى «ءال- فارابي جانە ءال- حۋرۋف: لينگۆيستيكالىق جانە فيلوسوفيالىق ويلارى» دەپ اتالاتىنىن اتاپ كورسەتتى.

دوكتور پۋرحاساننىڭ پىكىرىنشە، ءال-فارابيدىڭ «ءال-حۋرۋف» تراكتاتى سول كەزدەگى قوعامنىڭ سۇرانىسىنا عانا ەمەس، بۇگىنگى قوعام سۇرانىسىنا دا تولىقتاي جاۋاپ بەرەدى. ول ءابۋ ناسر ءال- فارابيدىڭ «ءال-حۋرۋف» ەڭبەگىن اۋدارىپ وعان تۇسىنىكتەر جازۋىنا سەگىز جىل ۋاقىت جۇمساعان.

«قاسىم پۋرحاسان مىرزا ءوز ويىن قورىتا كەلە، ءال-فارابيدىڭ مۇراسى، سونىڭ ىشىندەگى «ءال- حۋرۋف» تراكتاتىنىڭ ايتار ويى ۇشان تەڭىز، قوعامنىڭ بارلىق سۇراقتارىنا جاۋاپ بەرەتىن، اداسقان ءارى ازعىندىققا ۇشىراعان قوعامدى ەمدەيتىن جانە تۋرا جولعا سالاتىن مۇرا. ال فيلوسوفتار - قوعام دەرتىن ەمدەۋشىلەر. فيلوسوفيالىق وي دامىعان قوعام اداسپايدى جانە ىلعي دا دامۋ ۇستىندە بولاتىنىن ءبىرىنشى رەت ءال-فارابي اتاپ كورسەتكەن»، دەپ جازدى Parstoday.

ۆەبينار سۇراق-جاۋاپ جانە پىكىر الماسۋلارمەن جالعاستى. ۆەبينارعا شىعىس تانۋ، فيلوسوفيا جانە ساياساتتانۋ فاكۋلتەتتەرىنىڭ وقىتۋشىلارى، ستۋدەنتتەرى جانە ءابۋ ناسر ءال-فارابي ەڭبەكتەرىن زەرتتەيتىن جانە اۋداراتىن ماماندار قاتىسقان.

اۆتور: بەيسەن سۇلتان ۇلى