اشەكەيسىز الەم

ءومىرىڭنىڭ ورنەگىن سىزعان وزەن دە ەتەكتە جاتپاۋى مۇمكىن. كولەڭكەسىن تاسالار الىپ اعاش تا، جۇپارىن شاشقان مايسا ءشوپ تە وسپەۋى مۇمكىن. ءبىراق ول ءسىزدىڭ تۋعان اۋىلىڭىز عوي، ايىرباستاۋعا كەلمەيتىن الاقانداي اشەكەيسىز الەمىڭىز!

بايقاپ وتىرعاندارىڭىزداي، پەيزاجدىق كەسكىندەمەنىڭ كورنەكتى شەبەرى الەكسەي ساۆراسوۆتىڭ «كوكتەم. باۋ- باقشا» كارتيناسى 1893 -جىلى جازىلعان. XIX عاسىرداعى ورىس بەينەلەۋ ونەرىنىڭ ءسوزسىز جاۋھارى. سول كەزەڭدەگى ورىس ءومىرىن قاز- قالپىندا تاسپاعا تارتقانداي، ءبارى انىق ءارى بوزعىلتىم. مۇنىڭ نە ەرەكشەلىگى بار دەسەڭىز، سۋرەتشىنىڭ جازۋ مانەرى بارىنشا شىنايى، ساعىنىشتىڭ سامالى ەسىپ تۇر.

كەنەپ بەتىندەگى كورىنىس تىم كۇڭگىرت، كوڭىلىڭىزگە كولەڭكە ۇيالاتادى. دەسە دە سونىسىمەن ءبىر سۇيىسپەنشىلىك سىيلايتىنداي. اۆتور وقىرماندى قۋانتۋعا، اشىق تۇستەرمەن ساندەۋگە، ءتىپتى ويىن- ساۋىققا تولى سيۋجەت بەرۋگە تىرىسپايدى. قايتا ءالسىز بوياۋدىڭ اسەرىنەن اشەكەيسىز الەمىن پاش ەتەدى. ول سول توپىراقتىڭ پەرزەنتى ەكەنىن ماقتانىشپەن ايتىپ تۇرعانداي.

نەگىزىندە اتالعان شىعارما قىلقالام شەبەرىنىڭ كوركەمدىك ۇستانىمىنا سايكەس كەلەدى. ونىڭ قاي كارتيناسىن الىپ قاراساڭىز دا، ارتىق ەشتەڭە جوق. ءبارى سول قالپىندا، اقيقاتشىل!

قار قىسىمىنان جارتىلاي وپىرىلىپ قۇلاعان قورشاۋ، ويپاتتاعى ءالسىز اعاشتار مەن الاسا بۇتالار كەنەپتىڭ الدىڭعى قاتارىن قۇرايدى. سايدا قار ءالى تولىق ەرىگەن جوق، دەگەنمەن كوكتەمنىڭ لەبىمەن جەر لايساڭ تارتۋدا. ءۇي جانۋارلارى كۇننىڭ مەرەيىنە شومىلىپ تۇر. اسىرەسە تاۋىقتار قاردىڭ استىنان پايدا ىزدەپ، ابىگەرگە تۇسۋدە.

كومپوزيتسيانىڭ ورتالىعىندا شارۋا اۋلاسى بەينەلەنگەن. جالعىز تۇرعان ۇيدەن تەك توبەسى كورىنەدى. مۇرجاسىنان جۇقا ءتۇتىن شىعادى. تۇرعىن ءۇيدىڭ جانىندا ورمان بەلدەۋىن كورۋگە بولادى. مۇنداي بەلدەۋلەر ارقىلى شارۋالار ەگىندى جەلدەن قورعاعان. الىستان شىركەۋگە نەمەسە قوڭىراۋ مۇناراسىنا ۇقساس شاعىن عيمارات مۇنارتادى.

جۇتاڭ بويالعان پەيزاج ارقىلى سۋرەتشى ءوزى قونىستانعان مەكەننىڭ شەكسىزدىگى مەن قۇستاي ەركىندىگىن كورسەتىپ تۇر. ونى ەشتەڭەگە ايىرباستاعىسى كەلمەيدى. ءتۇپنۇسقا كارتينانى پەرم مەملەكەتتىك كوركەم گالەرەياسىنان كورۋگە بولادى.

مۇحتار كۇمىسبەك

egemen.kz