الماتىدا پوليتسەيلەرگە پىشاق الا جۇگىرگەن ايەلدىڭ نە ءۇشىن ۇستالعانى بەلگىلى بولدى

«كۇدىكتى - 1986-جىلى تۋعان م. ەسىمدى ازاماتشا قالا ورتالىعىندا ۇستالدى. ول پوليتسياعا بەلسەندى تۇردە قارسىلىق كورسەتىپ، پىشاقپەن شابۋىلدادى. سودان كەيىن ءوتىپ بارا جاتقانداردىڭ نازارىن اۋدارۋ ءۇشىن قاتتى ايعايلادى»، - دەيدى المالى اۋداندىق پوليتسيا باسقارماسىنىڭ باستىعى ەسەن ىسقاقوۆ.

پوليتسيا وكىلىنىڭ سوزىنشە، كۇدىكتى بىرنەشە ادامدى قىلمىستىق جاۋاپكەرشىلىكتەن بوساتۋعا ۋادە بەرىپ، قوماقتى قارجى العان.

«بىزگە ءبىرىنشى ءوتىنىش وتكەن جىلدىڭ قازان ايىندا تۇسكەن. قىلمىستىق جاۋاپكەرشىلىكتەن بوساتۋ ماسەلەسىن شەشۋگە كومەكتەسەمىن دەگەن جەلەۋمەن اتالعان ايەل «كليەنتتەن» 20 مىڭ دوللار العان. ازاماتتار مامىر ايىندا ەكىنشى وتىنىشپەن جۇگىندى. بۇل جاعدايدا كۇدىكتى قىلمىستىڭ كۆاليفيكاتسياسىن وزگەرتۋگە ۋادە بەرىپ، 2,5 ميلليون تەڭگە العان. م. ەسىمدى ازاماتشاعا قاتىستى ق ر ق ك 190- بابى 4- بولىگى بويىنشا قىلمىستىق ءىس قوزعالدى»، - دەدى سپيكەر.

قازىر ءتارتىپ ساقشىلارى ۇستالعان ازاماتشانىڭ وسىعان ۇقساس ەپيزودتارعا قاتىسى بار-جوعىن انىقتاپ جاتىر.

پوليتسيا قىزمەتكەرلەرى م. ەسىمدى ايەلدىڭ ارەكەتىنەن زارداپ شەككەندەردىڭ بارلىعىن 87087079202 جانە 87757744441 تەلەفوندارى ارقىلى حابارلاسۋىن سۇرايدى.