25 ақпанда зейнетақы төлемін емделуге пайдалануға арналған портал іске қосылады
«Бүгін аталған ереже (Емделуге берілетін біржолғы зейнетақы төлемдерін пайдалану ережесі) ресми түрде жарияланып, күшіне енеді. Біздің портал 2021 жылдың 25 ақпанында іске қосылады. Соңғы жаңашылдықтарды өзгерту үшін бізге үш күн уақыт қажет. Бастапқыда тізімге қосылған кейбір ауру түрлері соңғы уақытта алынып тасталған болатын», - деді Ләззат Ибрагимова Орталық коммуникациялар қызметіндегі баспасөз мәслихаты барысында.
Ал ҚР Денсаулық сақтау министрлігінің Медициналық көмекті ұйымдастыру департаменті директорының орынбасары Гүлнар Сәрсенбаева біржолғы зейнетақы төлемдерін емделуге пайдалану ҚР азаматтарына қосымша медициналық қызметтер алуға мүмкіндік беретіндігін айтады.
«Оны алу үшін азамат БЖЗҚ-ның интернет-ресурсы немесе «электрондық үкімет» веб-порталы арқылы біржолғы зейнетақы төлемінің қолжетімді сомасын анықтауы қажет. Егер қордағы сома жеткілікті болса, онда азамат тіркелген жері бойынша медициналық ұйымға жүгініп, дәрігерлік комиссияның біржолғы зейнетақы төлемдері есебінен емделуге жіберу туралы қорытындысын алуы қажет», - деді Г.Сәрсенбаева.
Еске салсақ, 2 қаңтарда ҚР Президенті Қасым-Жомарт Тоқаев зейнетақы жинағының бір бөлігін мақсатты пайдалануға қатысты заңға қол қойды.
Қазақстандықтардың зейнетақы жинақтарын пайдалану үшін жаңартылған «жеткіліктілік шегі» жарияланды. Зейнетақы жинағынан алуға болатын сома БЖЗҚ сайтында автоматты түрде көрсетіледі.