Абай ұлағатын ұрпақ санасына сіңіріп келемін - Альбина Гадирова
Альбинаның ұлты - лезгин. Әкесі мен анасы Латвияда танысып, сонда отау көтерген. Альбина сол елдің Юрмала қаласында дүниеге келген. Одан кейін екі жас қазақ еліне келіп, бақытты ғұмыр кешті. Қазақстанға 1994 жылы қоныс аударған. Десе де, азаматтық алуда біраз қиындыққа тап болған.
«Анам сол кездегі Қазақстан Республикасының Президенті Нұрсұлтан Назарбаевқа арнайы хат жазған. Сол арқылы азаматтыққа қол жеткізген. Мен үшін қазақылық қаймағы бұзылмаған Сыр өңірінің әрдайым орны бөлек. Дәл осы жерде қазақ тілін жетік меңгердім. Әкем лезгин болса да, қазақтың салт-дәстүрін берік ұстанып өтті. Мен де сол бағыт-бағдармен, қазақ еліне, тіліне деген сүйіспеншілікпен өз жолымды салып келемін. Қазір орыс сыныптарына қазақ тілінен сабақ беремін. Қазақтың ұлы ақыны Абай даналығын жас ұрпақ санасына сіңіруге күш салып келемін», - дейді Альбина.
Оның айтуынша, ұстаз беделін шәкірті көтереді. Ол әрбір оқушысын мақтан тұтады. Білім сапасы мұғалім жұмысының көрсеткіші екенін айтады. Альбинаның шәкірттері пәндік олимпиадада, ғылыми жоба жарыстарында жоғары деңгейден көрініп келеді.
«Шәкірттерім республикалық, облыстық деңгейдегі ғылыми жобалар сайысынан толайым табыстармен оралып жүр. Тұңғыш Президент - Елбасының қолдауымен өмірімізге енген «Болашаққа бағдар: рухани жаңғыру» бағдарламасы аясында ұстаз ретінде жастарды өлке тарихымен сусындатуға мән беремін, Қазақтың киелі жерлермен таныстырып, туған жерді қастерлеуді үйретудеміз. Сыр өңірі ұлттық және әлемдік тарих беттеріне атын алтын әріптермен жазып қалдырған тұлғаларға кенде емес. Ендігі кезекте жас буынға аға буын ұрпақтары қалдырған мол мұраны, өмірлік аманатты жадында сақтап, абыроймен көтеріп жүруіне жәрдемдесуіміз керек. Алайда, ұстаз және екі баланың анасы ретінде осы тәрбие жұмыстарын әрбір ата-ана отбасында да жүргізгенін қалаймын. Бүкіл арман-мақсатымды орындауға қолдау білдіріп келе жатқан жерлестеріме ризашылығымды білдіремін. Қазақ халқы барлық этнос өкілдерімен тату-тәтті ғұмыр кешіп келеді. Дүние жүзіндегі барлық мемлекеттер біздің еліміздегі осындай бірлік, татулық, ауызбірлікке қызыға қарайды. Сондықтан қашанда жайдары жүзді, дархан пейілді, жылы жүректі қазақ халқына алғысымыз шексіз», - дейді Альбина.