10:37, 20 Сәуір 2021 | GMT +6
Агроөнеркәсіптік кешенді тұрақты қаржыландыруды қамтамасыз ету қажет - Асқар Мамин
НҰР-СҰЛТАН. ҚазАқпарат – 2025 жылға қарай ауылдық аумақтарды дамыту жөніндегі нысаналы индикаторларға қол жеткізуді қамтамасыз ету қажет. Бұл туралы Үкімет отырысында ҚР Премьер-Министрі Асқар Мамин айтты, деп хабарлайды ҚазАқпарат тілшісі.
«Ұлттық экономика министрлігі ауылдық аумақтарды кешенді дамыту жұмысын тиісті көрсеткіштермен және бірыңғай тәсілмен үйлестіруді қамтамасыз етсін», - деді Асқар Мамин.
Оның атап өтуінше, Ауыл шаруашылығы министрлігі «Бәйтерек» холдингімен және әкімдіктермен бірлесіп, ауылдық жерлерде кредит қаражатына қажеттіліктің артуын ескере отырып, агроөнеркәсіптік кешенді тұрақты қаржыландыруды, барлық жоспарланған жобалардың іске асырылуын қамтамасыз етуі тиіс.
«Индустрия, Энергетика, Денсаулық сақтау, Білім, Мәдениет министрліктері барлық қажетті шараларды қабылдап, 2025 жылға қарай ауылдық аумақтарды дамыту жөніндегі нысаналы индикаторларға қол жеткізуді қамтамасыз етсін», - деді Премьер-Министр.