Ақмолада инспектор пойыз бригадирлерінен жүйелі түрде пара алған – агенттік

«Ақмола облысында Көкшетау қалалық сотының үкімімен Ақмола облысы бойынша көліктік бақылау инспекциясының бөлім басшысы Т.Оспановқа 3,3 млн теңге сомасында, бұрынғы қызметкерлер Ж. М. Үсентаевке 1 млн 790 мың теңге және К. Нұрбековқа 1,1 млн теңге айыппұл салынды. Бұл жағдайда Оспанов қызметтік жағдайын пайдаланған. Ол Үсентаев пен Нұрбековтың астыртын қолдауымен жүйелі түрде пойыз бригадирлерінен 5-20 мың теңге аралығында ақша алып отырған. Оспанов жолаушыларды билетсіз тасымалдау мен жүктерді заңсыз алып жүрудің жолын кесу шараларын қабылдамаған», - деді ҚР Сыбайлас жемқорлыққа қарсы іс-қимыл агенттігі бірінші департаментінің аға тергеушісі Данияр Бигайдаров ведомствода өткен баспасөз мәслихатында.

Агенттік өкілі Ақмола облысы бойынша көліктік бақылау инспекциясының бөлім басшысына қатысты 17 фактінің анықталғанын айтады.

«Талдау жұмыстары көрсетіп отырғандай, көліктік бақылау қызметкерлері жасаған сыбайлас жемқорлық қылмыстарының ең көп таралған түрі - парақорлық және лауазымдық өкілеттіктерін теріс пайдалану», - деді ол.