Ақтау маңында белгісіз сұйықтық құйылған шөлмектер табылды
Сары түсті сұйықтық құйылған бөтелкелер 11 мамырда, сәрсенбі күні табылды. Ер адам оны видеоға түсіріп алған. Ролик авторы бөтелкелерді ашуға қорыққанын, оның ішінде улы химикаттар болуы мүмкін екенін нақтылады. Бұл видеотаспаны экология департаменті көріп, оның мән-жайын анықтау үшін оқиға орнына мемлекеттік экологиялық бақылау бөлімі және экология департаментінің зертханалық-талдау бөлімі мамандары Баянды ауылдық округінің полиция қызметкерлерімен және Мұнайлы ауданының санитарлық-эпидемиологиялық бақылау басқармасының мамандарымен бірге барды.
Сарапшылар бөтелкелердің ішінде сақтау мерзімі өткен сусындар екенін анықтады.
«Бөтелкелерді кім және қашан тастағаны белгісіз. Біздің мамандар Мұнайлы ауданының әкімдігіне қалдықтарды жинап, полигонға апаруға кеңес берді», - деп нақтылады экология департаментінен.
Экологтар Мұнайлы ауданының полицейлеріне кінәлілерді анықтап, оларды әкімшілік жауапқа тартуды өтінді.