15:05, 01 Желтоқсан 2019 | GMT +6
Ақтөбе облысында ауа райына байланысты автожолдар жабылды
АҚТӨБЕ. ҚазАқпарат – Ақтөбе облысында ауа райының қолайсыздығына байланысты тасжолдардың кейбір бөлігінде көлік қозғалысы тоқтатылды, деп хабарлайды ҚазАқпарат тілшісі ҚР ІІМ ТЖК баспасөз қызметіне сілтеме жасап.
«1 желтоқсанда сағат 13:00-ден бастап Ақтөбе облысында ауа райының қолайсыздығына байланысты (қар, жаңбыр, көктайғақ) облыстық маңызы бар тасжолдардың кейбір бөлігі жабылды: Барлық автокөлік түрлері үшін «Шұбарқұдық-Ойыл-Қобда-Соль.Илецк» (0-265 шақырым, Шұбарқұдық кентінен Қобда кентіне дейінгі аралық) тасжолы және «Ақтөбе-Болгарка-Шұбарқұдық» (17-190 шақырым, Сазды кентінен Шұбарқұдық кентіне дейінгі аралық) тасжолында қозғалыс шектелді», - делінген хабарламада.
Бұдан бөлек, бүгін өңірде сағат 14:00-ден бастап ауа райының қолайсыздығына байланысты (қар аралас жаңбыр, көктайғақ) «Самара-Шымкент» тасжолының (710-615 шақырым аралығы, Ақтөбе қаласынан Қобда кентіне дейін) учаскесінде жүк және жолаушылар көлігіне жолға шығуға тыйым салынды.