Ақтөбеде 300-ден астам медқызметкер вакцинаның екінші дозасын қабылдады
Өткен тәулікте өңірде 19 адамнан коронавирус инфекциясы анықталды. Вирус жұқтырғандардың 14-і дерттің симптомды түріне шалдыққан.
«Қазіргі кезде 159 науқас ем қабылдап жатыр. Оның 52-і инфекциялық стационарлардағы ақ халаттылардың бақылауында. Жансақтау бөліміндегі бес науқас өкпені жасанды желдету аппаратына қосылған. Сонымен бірге өткен тәулікте 3 адам пневмония диагнозымен аурухаға түсті. Барлығы 48 науқас ем алып жатыр», - деді облыстық денсаулық сақтау басқармасы басшысының орынбасары Бекболат Ізбасаров.
Карантиндік стационарда 23 адам бар. Шекарадағы карантиндік станцияларда 8 адам жатыр.
«Облыста 300-ден астам медицина қызметкері вакцинаның екінші дозасын қабылдады. Бәрінің жағдайы жақсы. Денсаулығына шағым айтқан ешкім болмады», - деді Бекболат Ізбасаров.
Айта кетейік, қазіргі кезде 800-ге жуық адам үй карантинінде жатыр.