Ақтөбеде карантин туралы жалған ақпарат таратқан әйел үш тәулікке қамалды
Әлеуметтік желілерге мониторинг жүргізу кезінде «карантинге қарамастан коворкингке барып, кофе ішіп, қала ішінде серуендедім» деп жазба жариялаған Ақтөбе қаласының тұрғыны анықталды. Тексеру кезінде карантинде жатқан азаматтар тізімінде ол адамның жоқ екені анықталды.
«ҚР ӘҚБтК-нің 478-бабы, яғни, «Төтенше жағдай кезінде құқық тәртібін бұзуға итермелейтін іс-әрекеттер» бойынша әкімшілік хаттама толтырылды. 27 наурызда мамандандырылған әкімшілік сот шешімімен ол 3 тәулікке қамалды. Күн сайын полиция қызметкерлері еріктілермен бірге көшелерде төтенше жағдай режимін сақтауды тексереді. Қазіргі уақытта тәртіп сақшылары ҚР ӘҚБтК-нің 476-бабы бойынша төтенше жағдай режимін бұзбақ болған 33 деректің алдын алды. Жалған және расталмаған ақпаратты тарататын және құқық тәртібін бұзуға итермелейтін азаматтар ӘҚБтК-нің 478-бабы бойынша жауапқа тартылады. Осы бап бойынша бір адам әкімшілік жауапкершілікке тартылып, 106 мың теңгеге айыппұл төледі», - деді облыстық ПД баспасөз қызметінің жетекшісі Ерболат Сарқұлов.