Алматыда Ахмет Жұбановтың 115 жылдығына арналған онлайн концерт өтуде
Шара Ықылас атындағы халық музыкалық аспаптар музейінің әлеуметік желілерінде онлайн форматта өтіп жатыр.
Бағдарламада музей қорында сақталған Ахмет Жұбановтың домбырасы туралы тақырыптық дәріс бар.
Ғалымның түпнұсқа домбырасында күйші Әсел Алина «Би» күйін орындап берді.
Айта кетейік, бүгін халық мұрасының жанашыры, композитор Ахмет Жұбановтың туғанына 115 жыл.
Қазақтың тұңғыш кәсіби музыканты, музыка зерттеушісі, ұлағатты ұстаз, белгілі дирижер, кәсіби композитор, Қазақстан Ғылым академиясының өнер саласындағы академигі, Қазақстанның халық әртісі Ахмет Қуанұлы Жұбанов өнер көгіндегі жарық жұлдыздардың бірі.
Қазақ өнеріне өзіндік үлес қосып, өнеріміз бен мәдениетіміздің өркендеуіне күш-жігер жұмсаған халқымыздың біртуар дарынды ұлы - Ахмет Қуанұлы Жұбановтың өнегелі де өміршең еңбегі ғасырлар қойнауында үлкен қазына болып сақталатын баға жетпес құнды дүние.