Алматыда екі жылда студенттер үшін 38 жатақхана салынады

ҚР Тұңғыш Президент Нұрсұлтан Назарбаевтың бес әлеуметтік бастамасын жүзеге асыру мақсатында Алматыда 2022 жылдың соңына дейін 25 жоғары оқу орнында 16 мың орындық 38 жатақхана салу жоспарланған.

«Алматының жоғары оқу орындары студенттерін баспанамен қамтамасыз ету бойынша жүйелі жұмыс жүргізуде. Бағдарлама қолға алынғалы қалада 1377 орынға арналған 4 жатақхананың құрылысы аяқталды. Биыл Каспий университеті 200 орындық студенттер жатақханасына күрделі жөндеу жұмыстарын жүргізді. Д.Қонаев атындағы Еуразиялық заң академиясы жыл соңына дейін 100 орындық заманауи жатақхананы пайдалануға береді. Сондай-ақ, әл-Фараби атындағы Қазақ ұлттық университетінде (1260 орын) және Абай атындағы ҚазҰПУ-де (370 орын) жатақхана құрылысы басталды»,– деп хабарлады Jas Otan жастар қанатының қалалық филиалы.

Jas Otan жастар қанаты қалалық филиалының арнайы тобы Қонаев атындағы Еуразия заң академиясы мен Каспий университетіне қарасты студенттер үйіне барды. Олар нысандардың жағдайымен танысып, қысқы маусымға дайындығын тексерді.

Мердігер компания өкілінің айтуынша, Д.Қонаев атындағы академияның жатақханасын осы жылдың соңында өткізеді. Құрылыс жұмысы сапалы жүргізілді және барлық стандарттарға сай. Каспий университетінің жатақханасындағы жұмыс толығымен аяқталды.

Сонымен қатар, ол әр бөлмеге қажетті тұрмыстық техника мен жиһаздар қойылғанын жеткізді. Студенттерге барлық жағдай жасалған.