Алматыда сенаторлар ұшақ апатынан зардап шеккендердің халін білді
Сенаторлар науқастармен тілдесе отырып, оқиғаның мән-жайын анықтау депутаттардың бақылауында екендігін жеткізді.
Қазір жалпы 9 адам Алматы облысы, Алматы және Нұр-Сұлтан қалаларында емделіп жатыр. Алматының №4 ауруханасында 4 зардап шегуші ем-дом қабылдауда.
Ауруханада жатқан науқастардың жағдайы орташа деп бағаланып отыр.
Еске салайық, 2019 жылдың 27 желтоқсанында «Алматы-Нұр-Сұлтан» рейсін орындамақ болған «Bek Air» әуе компаниясының ұшағы радардан жоғалып кетті. Кейін 95 жолаушысы және 5 экипаж мүшесі бар ұшақ Алматы әуежайы маңында апатқа ұшырағаны мәлім болды. Салдарынан 12 адам қаза тапты, 69 жолаушы зардап шекті, оның 9-ы – балалар.
ҚР Премьер-Министрі Асқар Маминнің төрағалығымен ұшақ апатының себептерін тергеу бойынша Үкіметтік комиссияның отырысы өткізілді. Оқиғаның мән-жайын анықтау үшін ұшақ құлаған аумаққа арнайы комиссия жіберілді.
10 қаңтар күні елордада өткен баспасөз мәслихатында ҚР Премьер-Министрінің орынбасары Роман Скляр «Bek Air» ұшағының апатқа ұшырау себебінің басты нұсқасын атады. Сондай-ақ пилоттардың өзара әңгімесінің хронологиясын жариялады.