13:38, 18 Қыркүйек 2020 | GMT +6
Атырау облысында шетелдік жүк көлігі жанып кетті
АТЫРАУ. ҚазАқпарат – Атырау облысының Құрманғазы ауданында шетелдік жүк көлігі жанып кетті, деп хабарлайды ҚазАқпарат.
Облыстық Төтенше жағдайлар департаментінің мәліметіне сүйенсек, оқыс оқиға кеше, 17 қыркүйекте болған.
«Департаменттің диспетчерлік пультіне кешкі сағат 20:24-те Құрманғазы ауданында жүк көлігінің өртенгені туралы хабар түсті. «Атырау-Ақтөбе» тас жолының 798-шақырымында Түркиядан Өзбекстан Республикасына бара жатқан «Mercedes Benz» маркалы фура автокөлігінің жанғаны анықталды.
Өртті сөндіруге Құрманғазы аудандық төтенше жағдайлар бөлімінің 6 қызметкері мен 1 техника жұмылдырылды. Көлік өрті сағат 23:19-да толық жойылды. Қазір өрттің шығу себебі анықталып жатыр»,- деп хабарлады департаменттің баспасөз қызметі.
Еске сала кетелік, бұған дейін Атырауда жоғары кернеулі электр желісіне соғылған жүк көлігі өртенген еді.
