Атырау облысында шетелдіктерді заңсыз елге кіргізгендер тергелуде
Облыстық Полиция департаменті баспасөз қызметінен мәлім еткендей, өңірде «Заңсыз мигрант-Кордон» жедел-алдын алу іс-шарасы өтті.
Оның барысында заңсыз көші-қонды ұйымдастырудың 2 дерегі анықталған. Қазір аталған фактілерге қатысты ҚР Қылмыстық кодексінің 394-бабы 1-бөлігімен сотқа дейінгі тергеу жүріп жатыр.
Сондай-ақ рейд барысында құрылыс нысанында заңсыз жұмыс істеп жүрген Өзбекстан Республикасының 42 азаматы анықталды.
«Қазір шетелдіктер қабылдау-тарату орнына орналастырылды. Соңғы үш күнде 386 шетелдік азамат әкімшілік жауапкершілікке тартылды. Оның ішінде көші-қон заңнамасын бұзғаны үшін сот шешімімен 7 шетелдік ел аумағынан шығарылды. Сондай-ақ, Қазақстан Республикасының 98 азаматына қатысты халықтың көші-қоны саласындағы заңнамасын бұзғаны, ҚР заңнамасын бұза отырып шетелдік жұмыс күшін және көшіп келушілерді еңбекке тартқаны үшін әкімшілік хаттамалар толтырылды. Мәжбүрлеп шығару үшін арнайы қабылдау орнына алыс шетелден 3 азамат орналастырылды», - дейді департамент бастығы Қамза Үмбетқалиев.
Еске сала кетелік, бұдан бұрын Атырауда шетелдіктер наубайханада заңсыз жұмыс істегенін хабарлаған болатынбыз.