Атырау облысында жоғалып кеткен 3 адам табылды
Облыстық Төтенше жағдайлар департаменті баспасөз қызметінің ақпаратына қарағанда, кеше, 14 қаңтарда Атырау облысында Қызылқоға мен Жылыой ауданында тұрғындардың жоғалу дерегі тіркелген. Сондай деректің бірі 14 қаңтарда сағат 18:54-те Жылыой ауданынан түскен.
«Есен-Аман» шаруа қожалығының 2 қойшысы сағат 15:30 минут шамасынан бері хабарсыз кеткені хабарланды. Соған байланысты департаменттің аудандық бөлімінен 4 қызметкер мен «Есен-Аман» шаруа қожалығынан 1 адам «ТРЭКОЛ» автокөлігімен іздеуге шықты. Олар аудан орталығы – Құлсары қаласынан 70 шақырым қашықтағы «Шолтақай» учаскесіндегі мал қыстағынан радиусы 30 шақырымдық аумақта іздестіру жұмысын жүргізді. Соның нәтижесінде бүгін, 15 қаңтарда сағат 2:50-де «Казтрансойл» АҚ-на қарасты №3 мұнай айдау станциясына тартылған электр желісінің 306-бағанасының тұсынан жоғалған 2 азамат табылды. Оның бірі – Ақтөбе облысының тұрғыны, екіншісі – Өзбекстан Республикасының азаматы. Олар шаңды дауылда бағып жүрген 950 бас қой мен 1 бас жылқыдан айырылып қалған. Ал өздері адасып кеткен», -деп хабарлады департаменттің баспасөз қызметінен.
Сондай-ақ, 14 қаңтарда Қызылқоға ауданыда «Даулет» шаруа қожалығынан «УАЗ» автокөлігімен Жангелдин ауылына шығып кеткен бір азамат жоғалған. Оны іздестіруге төтеншеліктер мен полиция бөлімінен 6 қызметкер жұмылдырылған. Жоғалған азамат «Жамансай» учаскесінің маңынан табылған. Ол көлігінің жанармайы таусылып, далада тұрып қалған.
Еске сала кетелік, бұдан бұрын Атырау облысында 60 жастағы ер адам жоғалып кеткен еді.