Атырауда 9 айда экономикалық қылмыстардың залалы 2,8 млрд теңгені құрады

Атырау облыстық Экономикалық тергеу департаментінің басқарма басшысы Қахарман Жәрдемовтің мәліметінше, бизнесте жиі кездесетін заң бұзушылықтар салық төлеуден жалтару, жалған шот-фактураларды шығару, мемлекеттік қаражатты жымқыру немесе ұрлаумен байланысты болған.

«Биылғы 9 айда департаменттің өндірісінде 71 қылмыстық іс болды. Оның ішінде департамент қызметкерлерімен сотқа дейінгі тергеу басталған 56 қылмыстық іс бар. Бұл тергеу жүргізіліп жатқан істердің жалпы санының 78,9%-ын құрап отыр. Ал 34 қылмыстық істің 18-і сотқа жолданып, 16 іс ақталмайтын негіздерге сәйкес қысқартылды. Тергеуі аяқталған қылмыстық істер бойынша анықталған залалдың сомасы 2,8 млрд теңгені құрады. Оның 2,4 млрд теңгесі мемлекет пайдасына өтелді» -деді өңір кәсіпкерлерімен кездесуде Қахарман Жәрдемов.

Оның айтуынша, Д. есімді әйел құрған ұйымдасқан қылмыстық топтың жолы кесілген. «Күдікті 2017-2019 жылдары 715 млн теңгеден астам мөлшерде залал келтіре отырып, әртүрлі кәсіпкерлік субъектілерінен бюджетке салық төлеуден жалтаруға ықпал еткен жалған шот-фактуралар жазып берген. Сот үкімімен Д.-ның қылмыстық жолмен алынған қаражатқа сатып алынған мүлкін тәркіленіп, 7 жылға бас бостандығынан айырылды. Ұйымдасқан қылмыстық топтың қатысушыларына түрлі жылдарға бас бостандығынан айыру жазасы тағайындалды», - деп мәлім етті Қахарман Жәрдемов.

Еске сала кетелік, бұдан бұрын Атырау облысында білім басқармасының экс-шенеунігі сотталғанын хабарлаған болатынбыз.