Атырауда апатты үйдің тұрғындары жаңа пәтерге ие болды
Атырау қалалық тұрғын үй-коммуналдық шаруашылығы бөлімінің мәліметіне сүйенсек, былтырдан бері апатты жағдайдағы тұрғын үйлер мен жатаханалардың тұрғындарын жаңа мекенге көшіру жалғасып жатыр.
«Өткен жылы А.Құнанбаев және Ж.Досмұхамбетов көшесіндегі 2 жатақхананың тұрғындары «Береке» ықшамауданындағы жаңа үйге көшірілді. Ал, биыл 2 апатты үйдің тұрғындарына жаңа пәтерлердің кілті табысталды. Атап айтқанда, М.Әуезов көшесінде орналасқан №22 үйдің тұрғындарына «Жұлдыз» ықшамауданындағы үйден пәтер берілді. Ал, Достық көшесіндегі №14 үйдің тұрғындары «Береке» ықшамауданындағы жаңа мекенге көшірілді. Енді міне, «Бірлік» ықшамауданындағы АТП-1, АТП-2 мекен-жайындағы апатты деп танылған тұрғын үйлерден 32 отбасы «Жұлдыз» ықшамауданына қоныс аударды» деп хабарлады Атырау қалалық тұрғын үй-коммуналдық шаруашылшығы бөлімінің мамандары.
Аталған бөлім мамандарының айтуынша, апатты тұрғын үйлер мен жатаханалардың тұрғындарын көшіру жалғаса береді.