Атырауда бұрынғы тойхана тігін цехына айналды

Өңірлік коммуникациялар қызметінің ақпаратына қарағанда, атыраулық кәсіпкер Мейрамгүл Иманғалиева мейрамхананы тігін шеберханасына айналдырған. Ол бұл іске үлкен дайындықпен келген. Бала тәрбиесімен үйде отырған кезде «ханшайым мақпалы» деп аталатын матадан көрпе тігіп үйренген. жүрген.

«Сол кезде құрақ көрпе тұрғындардың бәрінде болған жоқ. Мен үйімде тапсырыс қабылдап, ісімді ұлттық нақыштағы көрпе-төсектер тігуден бастадым» - дейді Мейрамгүл Иманғалиева.

Осылай тәжірибе жинаған ісмер 2016 жылы өз кәсібін ашқан. Ұлттық үлгідегі қыз жасауы мен киім-кешек, түрлі бұйымдарды сәндеп тігетін шебер отбасылық ісін кеңейтіп, тапсырыс көлемін арттырған.

«Әсіресе, қыз жасауына тапсырыс көп түсіп, қызметкерлер саны артқан соң шағын цехты кеңейтуді ойдадық. Наурыз айынан бері Атырау қаласының іргесіндегі Көкарна ауылында бос тұрған «Ажар» тойханасын жалға алып, жұмысымызды жандандырдық» - дейді кәсіпкер.

Қазір тігін цехында 25 адам жұмыс істейді. Ою оюға арналған екі лазерлі станок алған. Айына 100-150 дана топтамаға тапсырыс түседі. Кәсіпкер тігіншілерді тегін түскі аспен қамтып отыр. Сондай-ақ тігіншілерге 150 мың теңгеге дейін жалақы төлейді.