22:11, 12 Шілде 2021 | GMT +6
Ауғанстандағы ресейлік дипломаттар Өзбекстанға эвакуацияланды
ТАШКЕНТ. ҚазАқпарат – Ауғанстандағы Ресейдің бас консульдығының қызметкерлері Өзбекстанға эвакуацияланды, деп хабарлайды ҚазАқпараттың Өзбекстандағы меншікті тілшісі.
Өзбекстанның сыртқы ведомствасы таратқан мәліметке қарағанда, Ауғанстанның Хайратон қаласындағы Ресейдің бас консульдығының дипломаттары Өзбекстанға ауыстырылды. Бұл шара ресейлік қызметкерлердің қауіпсіздігі үшін жасалған.
«Ауғанстанның Хайратон қаласындағы Ресейдің бас консульдығының қызметкерлері Өзбекстан аумағына жеткізілді», - деді Өзбекстан Сыртқы істер министрлігінің ресми өкілі Юсуп Кабулжанов.
Еске салсақ, Ауғанстандағы жағдай күрделеніп Ауғанстанның қарулы әскерилері Өзбекстан мен Тәжікстан аумағына өтіп кеткен еді. «Талибан» қозғалысы Ауғанстандағы көптеген жерлерді басып алды.