11:22, 19 Сәуір 2021 | GMT +6
Батыс Қазақстанда автокөлік аударылып, 66 жастағы әйел көз жұмды
ОРАЛ. ҚазАқпарат – Батыс Қазақстан облысында автокөлік аударылып, 66 жастағы әйел көз жұмды, деп хабарлайды ҚазАқпарат тілшісі.
БҚО ТЖ департаментінің баспасөз қызметі мәлім еткеніндей, оқиға 18 сәуір күні сағат 17.19-да Ақжайық ауданы аумағында болды.
Орал-Атырау жолының 205-шақырымында (трассалық- медициналық құтқару бекетінен 80 км қашықтықта) «Ниссан» автокөлігі жолдан шығып кетіп, аударылған.
Жол-көлік оқиғасы орнынан 1954 жылғы әйел мен 1957 жылғы ер адам Ақжайық аудандық ауруханасына жеткізілді.
Оқиға орнына 4 қызметкер 1 техникамен барды. Зардап шеккендер – Ақтөбе облысының тұрғындары.
19 сәуір күні әйел ауруханада қайтыс болды.
Еске сала кетейік, бұдан бұрын БҚО-да 2,4 тонна балықты заңсыз тасымалдаған екі автокөліктің ұсталғанын жазған болатынбыз.