Birgemiz: Қостанайлық волонтерлер 4 мың адамға дәрі-дәрмек жеткізді

None
None
ҚОСТАНАЙ. ҚазАқпарат – Қостанай облысында волонтерлік жобалардың негізгі бағыты анықталды. Бұл туралы өңірлік коммуникациялар алаңында өткен брифингте облыстық жастар саясаты мәселелері жөніндегі басқарманың басшысы Марат Жұрқабаев мәлім етті, деп хабарлайды ҚазАқпарат.

Ел жастары «Волонтер жылы» аясында негізгі 7 бағыт бойынша жобаларын ұсынады. Олар: «Сабақтастық», «Денсаулық», «Таза әлем», «Асыл мұра», «Қамқор», «Білім» және «Үміт».

«Аталған бағыттардың ішінен Қостанай облысы өзінің волонтерлік қызметін «Таза әлем» бағытына арнайтын болады. Бұл – қоршаған ортаны қорғауға, өзендер мен ормандарды тазалауға, ағаш отырғызуға және қоқысты сұрыптауға үйретуге бағытталған жоба. Біздің жастар «Волонтер жылы» аясында іс-шараларды жүзеге асыру бойынша жыл басынан бері 235 іс-шара өткізді. Оған 10422 адам қатысты. Әсіресе, жалғыз тұратын қарттарға тұрмыстық көмек көрсетуге, тұрғын үй аумағын қардан тазартуға, «Birgemiz» республикалық акциясы аясында мұқтаж жандарға азық-түлік жеткізу кезінде жақсы жұмыс атқарды», – деді Марат Жұрқабаев.

Өңірде волонтерлік қозғалысты насихаттау мен дамытуды жүзеге асыратын республикалық фронт-кеңсе ашылған болатын. Жалпы, облыста шамамен 15 мың адамды біріктірген 90 волонтер ұйымы жұмыс істейді.

«Жастарымыз «Birgemiz» республикалық акциясы шеңберінде белсенді болды. Қостанай қаласындағы 5 емханамен бірлесіп жұмыс істелді. Барлығы 4 мыңнан астам адамға дәрі-дәрмек тасымалданды. Сонымен қатар волонтерлік ұйымдар республикалық «Халық» қоры акциясына да қатысуда. Бұдан бөлек волонтерлеріміз «Жасыл ел» бағдарламасын да қолдап отыр. Бағдарлама аясында 76 млн теңге игеріледі. Абаттандыру шараларына 1047 адам қатысады. Кадр жағынан да, қаржы жағынан да әр ауданға тиісті қаражат бөлінді», - дейді басқарма басшысы.


Соңғы жаңалықтар