Биыл 18 мың шақырым жолдың сапасы тексеріледі
Былтыр республикалық және жергілікті жолдарды жөндеу нысандарында 810 бұзушылық анықталды Оның 340-ы республикалық, 470-і жергілікті желіде тіркелген. Үкімет отырысында Индустрия және инфрақұрылымдық даму министрі Бейбіт Атамқұлов осындай деректер айтты.
«Жол сапасын дағалаудың арқасында мердігерлік ұйымдар мен техникалық қадағалау сарапшылары материалдардың сапасы мен технологияның сақталуына баса назар аудара бастады. Биыл республикалық және жергілікті желілер бойынша жол-құрылыс жұмыстары толық сапа сараптамасымен қамтылады. Құралдық тексеру республикалық желінің 18 мың шақырымына жүргізіледі. Оның қорытындысы бойынша жөндеу жөніндегі іс-шаралар кешені әзірленеді», - деді министр.
Бейбіт Атамқұловтың мәліметінше, жол активтерін цифрлық басқару жүйесін дайындау жобасы сәтті іске асып жатыр.
«Бұл жүйе ағымдағы жылы республикалық және 2025 жылға дейін жергілікті желіге енгізілмек. Сондай-ақ, жыл соңына дейін 42 салалық нормативтік-техникалық құжат халықаралық стандарт талаптарына сәйкестендіріледі», - деді ол.
Еске салсақ, осы Үкімет отырысында Бейбіт Атамқұлов Батыс өңірлердегі ішкі жолдардың сапасын сынға алды.
Сондай-ақ, ведомство басшысы елдегі ақылы жолдардан қанша қаражат түсетінін баяндады.